भांगरभूंय | प्रतिनिधी
लोकसभा वेंचणुकीचे वेध देशाक केन्नाच्यान लागिल्ले. आतां जाल्यार लोकसभा वेंचणुकांच्यो तारखोय जाहीर जाल्यात
आनी 19 एप्रील सावन वट्ट सात टप्प्यांत मतदान लेगीत जातलें. लोकसभेच्या नव्या वेंचणुकांच्या निमतान सगले कडेन सद्या चर्चा आसा ती नारी शक्तीची. नारी शक्तीच्या खऱ्या खुऱ्या उत्कर्शाची. बायल सशक्तीकरणाचेर फाटलीं जायतीं वर्सां आमी उलयत आसात आनी वेगळ्यावेगळ्या पक्षांच्या राजकी फुडाऱ्यांची ताचे वयलीं भाशणांय आमी आयकतात. मात बायल सशक्तीकरण हो चड करून फक्त चर्चेचोच विशय जाला. मात येता ती लोकसभा वेंचणूक ताका आडवाद थारपाक शकता. बायलां खातीर राजकी राखीवता ही लोकसभेचे फुडले वेंचणुके सावन कार्यवाहींत हाडपाची आसली तरी नारी शक्तीचो अस्सल उत्कर्शाचो विडो उखलपी प्रधानमंत्री नरेंद्र मोदी हांकां मात हे विशीं आपूण आनी आपलो पक्ष कितलो गंभीर आसा हें ह्या वेंचणुकेंतल्यान दाखोवन दिवपाचें आसा. हे ह्या लोकसभेंतलो बायल खासदारांचो आंकडो वाडोवपा खातीर तांणी जे यत्न सुरू केल्यात ताचे वयल्यान म्हणपाक जाता. कोणाच्याय धान्या मनांत नासतना दक्षीण गोंय लोकसभा मतदारसंघांत एके बायलेक उमेदवारी दिवपाचे यत्न जातात आनी गोंयांतल्या नामनेच्या धेंपो घराण्याची सून आनी धेंपो उद्देग समुहाचो अध्यक्ष श्रीनिवास धेंपो हांची घरकान्न पल्लवी धेंपो हांकां दक्षीण गोंयांतली भाजपाची उमेदवार म्हूण नांव जाहीर जाता, हें कांय एके रातयांत घडून आयिल्लें ना. जाल्यार पुराय विचार करून हो निर्णय घेतला. नारी शक्तीच्या खऱ्या खुऱ्या उत्कर्शा खातीर आमी फक्त उलयत बसनात तर ते खातीर चड गांभिर्यान फुडलीं पावलां घालतात हेंच भाजपान हातूंतल्यान दाखोवन दिलां.
पल्लवी श्रीनिवास धेंपो हांची दक्षीण गोंयांतली भाजपाची उमेदवार म्हणून जाहीर केल्ल्यान नारी शक्तीच्या उत्कर्शा खातीर केंद्रांतल्या भाजपा सरकारान एका फाटल्यान एक अश्यो ज्यो येवजण्यो जाहीर केल्यात, तांचो विचार करतना गोंयांत पल्लवीच्या रुपान नारी शक्तीचो दक्षीण गोंयांतल्यान उदय जावपाक लागला असो समज करून घेवपाक मेळटलो काय, हो गोंदळांत उडोवपी प्रस्न आसा. तरीय ताची जाप चड करून हय अशी मानची पडटली. बायल शक्तीची जाण चड सोंपी, सोबीत जावची हेच खातीर प्रधानमंत्री नरेंद्र मोदी नारी शक्तीचेर चड करून भर दितात हें आमी पळयतात. आपलो प्रधानमंत्री म्हणून तिसरो कार्यकाळ नारी शक्तीच्या उत्कर्शाचो एन नवो अध्याय बरयिल्लो अशें प्रधानमंत्री नरेंद मोदी सांगतात तशेंच लोकसभेंत बायलांक चडांत चड प्रतिनिधित्व आसचें हे खातीर ते कशे यत्न करतात हें दक्षीण गोंयाक बायल उमेदवार दिवन तांणी दाखोवन दिलां. प्रधानमंत्री नरेंद्र मोदी हांचे नवें धक्को तंत्र आतां लोकां सामकार चडूच येवपाक लागलां. पल्लवी धेंपो हांचें नांव दक्षीण गोंयांत उमेदवार म्हणून जाहीर जावप हें धक्को तंत्रा बगर वेगळें म्हणपाक मेळचें ना. विरोधकांक निमाणे मेरेन काळखांत दवरून जाहीर केल्ली ही उमेदवारी म्हणल्यार तांकां बुचकाळ्यांत उडोवपी थारल्या. पयलींच माकोड, तातूंत सोरो पियेलो, हे उक्ती प्रमाण माकडाक सोरो पिवपाक दिवपाचें काम भाजपान केलां आनी ह्या धक्को तंत्रांतल्यान विरोधक कितले मेरेन साल्वार जातले, हो दुबाव आसा.
धेंपो उद्देग समुहाचो अध्यक्ष श्रीनिवास धेंपो हांची राजकारणांत येवपाची खूब इत्सा आशिल्ली आनी तांणे ती जायते फावटी उलोवन लेगीत दाखयिल्ली. म्हज्या ‘मनोहर पर्रीकर ऑफ द रेकॉर्ड’ ह्या पुस्तकाच्या प्रकाशन कार्यावळींत मुख्यमंत्री डॉ प्रमोद सावंत हांचे हाजिरेंत तांणी हें उलोवन दाखयतकच स्वता मुख्यमंत्री मनोहर पर्रीकार हांणीच आपल्याक राजकारणाचे घाणींत केन्नाच पडनाका असो सल्लो दिलो आनी उपरांत आपणे राजकारणांत येवपाचो विचार केन्नाच केलो ना अशें तांणी सांगिल्लें. तांची घरकान्न पल्लवीची राजकारणांत सक्रीय जावपाची कितली इत्सा आशिल्ली हें कळपाक मार्ग ना, तरीय श्रीनिवास धेंपो हांणीच आपली अपूर्ण उरिल्ली इत्सा पुराय करपा खातीर पल्लवीक फाटबळगें दिलें आसतलें असो कोणे तर्क काडल्यार तो चुकीचो म्हणपाक मेळचो ना. फाटल्या देड दोन दसकांत राजकारणांतली घाण कितली नितळ जाल्या हें सांगपाक येना तरी मनोहर पर्रीकार हांचे शिश्य आशिल्ले मुख्यमंत्री डॉ. प्रमोद सावंत हांचो मात हो मास्टर स्ट्रोक म्हणपाक मेळटलो. अर्थांत दिल्लींतल्यान बायल उमेदवार दिवपा खातीर चेंपण आयले उपरांत हें सगळें घडून आयलें, तरी दक्षीण गोंय मतदारसंघांतल्यान नारी शक्तीचो नवो अध्याय बरोवपाक भाजपा सुरवात करतलो हातूंत मात कसलोच दुबाव ना. धेंपो घराण्याक राजकी फाटभूंय ना तरीय साठेक वर्सां आदीं श्रीनिवास धेंपो हांचाे बापोल आजो सर्गेंस्त वैंकूठ (सदुलबाब) शेणवी धेंपो हाणी काँग्रेस पक्षाचे तिकेटीचेर पेडणें मतदारसंघांतल्यान वेंचणूक लडयिल्ली. मात ते विधानसभेंत पावपाक शकले नात. आयज स दसकां उपरांत गोंयांतल्या राजकारणान वेगळीच दिका घेतल्या सद्याचे परिस्थितींत पल्लवी धेंपो हांचो लोकसभेंतलो प्रवेश कोणूय आडावपाक शकतलो अशें दिसना.
लोकसभेच्या वेंचणुकेच्या गोंयांतल्या इतिहासाचेर नदर मारल्यार फाटल्या 61 वर्सांत संयोगिता राणे हांच्या रुपांत 1980 वर्सा उत्तर गोंय लोकसभा मतदारसंघांतल्यान एकसुरी बायल लोकसभेंत पाविल्ली. ते उपरांत लोकसभा वेंचणुकेच्या रिंगणात बायल उमेदवार क्वचीत दिसल्यो पूण भारतीय जनता पक्षान बाजी मारतना बायलांक आश्वस्त केल्ल्याचें दिसता. दक्षीण गोंयांत जाल्यार लोकसभा वेंचणुकेंत बायल उमेदवार केन्नाच दिसलीच ना. अशा वेळार पल्लवी धेंपो हांचें काम तितलें सोंपें ना तरीय सामकेंच कठीण अशेंय म्हणूंक मेळचें ना. ‘धेंपो’ फॅक्टर हो तांचे खातीर खूब म्हत्वाचो आनी निर्णायक थारतलो हातूंत दुबाव ना. तेच वांगडा भाजपाची संघटीत शक्ती तांचे फाटल्यान आसतली. तेन्ना अजून काळखांत आशिल्ल्या काँग्रेस पक्षाक प्रत्यक्ष रणांगणाचेर भाजपा कडेन दोन हात करप तितलें सोंपें आसचें ना. चंद्रकांत कवळेंकार, नरेंद्र सावयकार हांची जाल्ली निर्शेणी समजुपा सारकी आसली तरी तांचे तुळेंत पल्लवी धेंपोक चड मताधिक्यान वेंचून येवपाची आस्त भाजपाक बाळगुवपाक मेळटली. गोंयांतले नामनेचे धेंपो, तिंबलो, साळगांवकार ह्या उद्देजक घराण्यांतले सर्गेस्त अनील साळगांवकार हांचो आडवाद सोडल्यार वेंचणुकेच्या राजकारणांत हेर कोणूय देंविल्ले नात हो इतिहास आसतना तिंबलो घराणांतल्यान सून म्हणून धेंपो घराण्यांत पाविल्ल्या पल्लवी धेंपो हांच्या राजकी प्रवासाची ही फक्त सुरवात आसा. तरी ते खातीर आशिल्ल्या अनुकूल अशा वातावरणाचो लाव उठोवन तांकां धडाकेबाज सुरवात तर नक्कीच करपाक मेळटली. दक्षीणेंत भाजपान घाल्ले हे गुगलीक काँग्रेस पक्ष आतां कशें कितें तोंड दिता हें पळोवपाची उमळशीक सगल्यांक आतां लागतली. उत्तर गोंयांतलो उमेदवार जाहीर करपाक काँग्रेस पक्षाक कळाव कित्याक लागता हें कळना. थंय कसली गुगली काँग्रेस पक्ष घालतलो असो प्रश्न फकांडांन सध्या विचारतात.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
