भांगरभूंय | प्रतिनिधी
मडगांव: दक्षीण गोंय जिल्ह्यांतल्यो खुबश्यो असुरक्षीत आनी मोडपाक पाविल्ल्या इमारतींचो वापर आजूनय रावपा खातीर आनी वेवसायीक कारणांक लागून जाता. अशा धोको निर्माण करपी इमारतींनी नागरिकांनी रावचें वा वेवसायक करचो न्हय, असो उलो दक्षीण गोंय जिल्लोधिकार्यांनी परत मारला.
हे विशीं जिल्हाधिकार्यांनी स्पश्ट केलां, जीण आनी मालमत्तेक धोको आसूनय कांय धोको निर्माण करपी इमारती वापरतात. ह्या इमारतींच्या सुरक्षिततेची सुनिश्चितता करपााची मुळावी जापसालदारकी संबंदीत धनी आनी तातूंत रावतल्यांची आसा.
नागरिकांक सल्लो
खंयचेय असुरक्षीत वा संरचनात्मक नदरेन घटमूट नाशिल्ले इमारतीची म्हायती रोखडीच थळावे नगरपालिकेक दिवची. जर ती इमारत नगरपालिकेच्या अधिकार वाठारा भायर आसा जाल्यार योग्य कारवाये खातीर संबंदीत गट विकास अधिकार्यांकडेन कागाळ करची.
मजगतीं, खंयच्याय आपत्कालीन परिस्थितींत नागरिकांनी हॅल्पलायन नंबर ११२ वा दक्षीण गोंय जिल्होधिकारी कार्यालयाच्या नियंत्रण कुडीक (०८३२ -२७९४१००) ह्या नंबराचेर फोन करचो असोय उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
