भांगरभूंय | प्रतिनिधी
मडगाव : दक्षीण गोंयच्या हॉस्पिसिओ हॉस्पिटलांत विवीध ६४४ सुवातां मदल्यो ४५७ सुवातो भरल्यात. जाल्यार १८७ सुवातो रित्यो आसात. कंत्राटी पध्दतीचेर १९६ जाणांची भरती केल्या. हातूंत मल्टीटास्किंग कर्मचार्यांच्या १७५ सुवातां मदल्यो ७३ सुवातो आजूनय रित्यो आसात, अशी म्हायती भलायकी मंत्र्यांनी विधानसभेंत लेखी जापे वरवीं दिल्या. हाचे वांगडाच खांटी सयत मनीस बळाचीय आनीक गरज आशिल्ल्याचें तांणी स्पश्ट केलें.
हॉस्पिसिओंत सरळ येवपी दुयेतीं वांगडाच दक्षीण गोंयच्या विवीध भलायकी केंद्रांतल्यान उपचारा खातीर धाडपी दुयेतींचीय जापसालदारी आसता. खाटी नासल्यारूय खंयच्याय दुयेंतीक उपचाराक ना म्हणिनात, तांकां बरी सेवा दिवपाचे यत्न आशिल्ल्याचे वैजकी अधिकारी सांगतात. खाटींचो आंकडो वाडयल्यार पयलींच कामाचो ताण आशिल्ल्या कर्मचार्यांचेर आनीक भार पडटलो. हाका लागून मनीसबळ वाडोवपाचीय सध्या गरज निर्माण जाल्या. हॉस्पिटलांतल्या खाटींच्या प्रस्नाचेर भलायकीमंत्री राणे हांणी हॉस्पिसिओंत दुयेतींक खाटींचो उणाव आशिल्ल्याचें मान्य करीत दादलो विभाग आनी बायल प्रभागांत दरेकी धा खाटी आनी ते खातीर गरजेच्या कर्मचार्यांची नियुक्ती करप गरजेचें आसा, अशें म्हणलें. तशेंच आपात्कालीन स्थिती वेळार दुयेतींक व्हिलचेअर वा स्ट्रेचराचेर उपचार करुन, ताचे उपरांत उपलब्धते प्रमाण खाट उपलब्ध केल्ल्याचेंय सांगलें.
बांबोळे रेफर करपी दुयेतींच्या आकड्यांत दर वर्सा वाड
दक्षीण गोंय जिल्लो हॉस्पिटलांतल्यान २०२१ वर्सा ३७१७ जाणांक गोमेकॉत उपचारा खातीर धाडले. हातुंतल्या तिगांक मरण आयलें. २०२२ वर्सा ३८८५ धाडले हातुंतल्या धा जाणांक मरण आयलें, २०२३ वर्सा ४४४२ दुयेतींक धाडले तांतल्या दोगांक मरण आयलें. २०२४ वर्सा ४७३९ दुयेतींक बांबोळे उपचारा खातीर धाडले, तांतल्या तिघांग मरण आयलें, जाल्यार २०२५ वर्सा जून मेरेन २२०९ दुयेतींक गोमेकॉंत उपचारा खातीर धाडिल्ल्यां मदल्या दोगांक मरण आयलें.
भलायकी केंद्रांतल्यान हॉस्पिसिओंत धाडपी दुयेतींच्या आंकड्यांत वाड
दक्षीण गोंयच्या विवीध भलायकी केंद्रांतल्यान जिल्लो हॉस्पिटलांत दुयेतींक उपचारा खातीर धाडपी दुयेतींच्या आंकड्यांतूय दर वर्सा वाड जाता. २०२१ सावन फाटल्या पांच वर्सांच्या काळांत कुडचडें भलायकी केंद्रांतल्यान ४८४५ दुयेतींक धाडले. मडगांवच्यान ९१ दुयेंती, बाळ्ळी केंद्रांतल्यान ६५८० दुयेंती, कासावली केंद्रांतल्यान २७२४ दुयेंत धाडले. चिंचणी केंद्रांतल्यान ४४४ दुयेंती धाडले. कुडतरी केंद्रांतल्यान २०६३ दुयेंती, लोटलीच्यान ३०१ दुयेंती, नावेली केंद्रांतल्यान ७५७ दुयेंती, शिरोडें केंद्रांतल्यान २०५४, सांगें भलायकी केंद्रांतल्यान ३८३४ दुयेंती जाल्यार केपें भलायकी केंद्रांतल्यान ५०८३ दुयेतींक दक्षीण गोंय हॉस्पिटलांत उपचारा खातीर धाडले. हाका लागून जिल्लो हॉस्पिटलांवेलो भार वाडतूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
