भांगरभूंय | प्रतिनिधी
दक्षीण आफ्रिकेन संवसारीक वन डे क्रिकेट सर्तींतले आपले निमाणे लीग मॅचींत अफगाणिस्तान पंगडाक 5 विकेटींनी हारयलो. आफ्रिकेन 245 धांवड्यांची मोख 47.3 ओव्हरींनी 5 विकेटी वगडावन मेळयली. रॅसी व्हॅन डेर ड्युसेनान नाबाद 76 धांवड्यांची खेळी केली. ओपनर क्विंटन डी कॉकान 41 आनी डॅव्हिड मिलरान 24 धांवड्यांचें योगदान दिलें. अफगाणिस्ताना वतीन मोहम्मद नबी आनी राशीद खान हाणें दरेकी 2 विकेटी घेतल्यो.
क्विंटन डी कॉकान सदचे भशेन आफ्रिकेक आक्रमक सुरवात करून दिली. टेम्बा बवुमा (23) संघर्श करतना दिसलो. तातूंत ताच्या पांयाक कॅच आयलो. 11वे ओव्हरींत आफ्रिकेक पयलो धपको बसलो. फाटोफाट 14वे ओव्हरींत क्विंटन डी कॉक एलबीडब्ल्यू बाद जालो. क्विंटनान 47 बॉलांनी 2 चवके आनी तीन सक्यांचे मजतीन 41 धांवड्यो केल्यो. एडम मार्करम आनी रॅसी व्हॅन डेर ड्युसन हाणें अर्द शेंकड्याची भागिदारी करून मॅच बेगीन सोंपोवपाचो यत्न केलो. पूण, राशीद खानान ही जोडी फोडली. मार्करम (25) कॅच बाद जालो. हॅन्रीच क्लासेनाची कॅच फुडले ओव्हरींत सुटली. पूण, राशीदानूच ताका 10 धांवड्यांचेर बोल्ड केलो.
व्हॅन डेर ड्युसेन आनी डॅव्हिड मिलर हांणी आफ्रिकेचो डाव सांबाळ्ळो. स्पिनरांनी आफ्रिकेचे धांवगतीचेर अंकूश दवरिल्लो. डेर ड्युसेन आनी मिलर हाणें 43 धांवड्यांची भागिदारी केली. पूण, मोहम्मद नबीच्या बॉलाचेर मिलर (24) कॅच बाद जावन तंबूंत परतलो. राशीद, नबी आनी उर रहमान हे स्पिनरांचे तिकडीन आफ्रिकेक चेपणाखाला दवरिल्ली. नवीन उल हकाक 44वे ओव्हरींत बॉलींग घालपाक आपयलो. ताचे बॉलिंगेचेर अॅंडील फेहलुकायेची कॅच सुटली. हो गॅम चेंबर खीण थारपाक शकतालो. नूर अहमदाच्यो तीन ओव्हरी निमाण्या टप्प्या खातीर राखून दवरिल्ली. फेहलुकवायान नवीनाक दोन सके मारून आफ्रिकेचेर आशिल्लें चेपण पयस केलें. ह्या दोगांयनी 65 धांवड्यांची भागिदारी करून आफ्रिकेक जैत मेळोवन दिलें.
ते पयलीं नरेंद्र मोदी स्टेडीयमाचेर अफगाणिस्तानान टॉस जिखून पयलीं बॅटींग करपाचो निर्णय घेतलो आनी निर्धारीत 50 ओव्हरींनी सगल्यो विकेटी वगडावन 244 धांवड्यो केल्यो. अजमतुल्लाह ओमरजईन नाबाद 97 धांवड्यांची खेळी केली. अफगाणिस्तानान एका वेळार 116चेर स विकेटी वगडायिल्ल्यो. पूण, ताच्या सकयल्या बॅट्समनांनी 128 धांवड्यो केल्यो.
दक्षीण आफ्रिके वतीन जेराल्ड कुट्जीन 4 विकेटी घेतल्यो. लुंग एन्गिडीन आनी केशव महाजारान 2-2 विकेटी मेळयल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
