भांगरभूंय | प्रतिनिधी
दर्बान, खबरां संस्था: दक्षीण आफ्रिकेंत आयच्यान १९ वर्सां पिराये सकयल्या वर्ल्डकपाक सुरवात जाल्या. दरेका क्रिकेट खेळगड्यां खातीर ‘अण्डर १९’ पांवडो खूब म्हत्वाचो. जंय चडश्या खेळगड्यांनी निवड जाता आनी ते वरिश्ठ संघा मेरेन पावतात. विराट कोहली, स्टीव स्मिथ, केन विल्यमसन, रोहित शर्मा सारकिल्ले खेळगडे अण्डर १९ पांवड्यार पर्जळून वरिश्ठ पंगडांत पावल्यात. पुराय क्रिकेट मोगीचे दोळे ह्या वर्ल्ड कपाचेर आसतले. फुडाराक खंयचे नखेत्र क्रिकेट जगांत पर्जळटलें हें सगळ्यांक जाणून घेवपाचें आसा. सर्तीची पयली मॅच आयर्लंड आनी अमेरिके मदीं ब्लुमफॉन्टनांत जातली. पूण हें वर्ल्डकप आदीं दक्षीण आफ्रिकेंत खेळोवपाचें नासलें. तें श्रीलंकेंत जावपाचें आशिल्लें. पूण नोव्हेंबरांत आयसीसीन श्रीलंका क्रिकेट बोर्डाक निलंबीत केल्ल्यान दक्षीण आफ्रिकेक हे सर्तीचें यजमानपद मेळ्ळें. दोन महिन्यांत दक्षीण आफ्रिकेन हे सर्ती खातीर तयारी केली. सरकाराच्या हस्तक्षेपाक लागून आयसीसीन श्रीलंकेक निलंबीत केलें.
हे सर्तींत वट्ट १६ पंगड वांटो घेतात. दरेकीं चार पंगडांक चार गटांनी विभागल्यात. ताचे उपरांत सुपर-६ फेरी जातली. उपरांत पयल्या ४ पंगडांक उपांत्य फेरयेंत पात्रताय मेळटली. ग्रुप स्टेज २८ जानेवारी मेरेन चलतली आनी ताचे उपरांत सुपर-६ फेरी ५ फेब्रुवारी मेरेन चलतली. पयली सेमी फायनल ६ फेब्रुवारीक आनी दुसरी सेमी फायनल ८ फेब्रुवारीक जातली. ताचे उपरांत ११ फेब्रुवारीक बेनोनी हांगा निमाणी मॅच जातली. ही सर्त दक्षीण आफ्रिकेंतल्या पांच सुवातींनी जातली. पोचटेफोस्ट्रम, ब्लोमफॉन्टेन, बेनोनी, किम्बर्ली, पूर्व लंडन हांगा ह्यो मॅची जातल्यो.
सध्याचो चॅम्पियन म्हणून टीम इंडिया सर्तींत प्रवेश करता. यश धुल हाच्या फुडारपणा खाल भारतान २०२२ वर्सा वर्ल्डकप जिखिल्लो. हे खेपे उदय शरणाच्या फुडारपणा खाला हो पंगड सवे खेपे चॅम्पियन जावपाचो यत्न करतलो. भारतान २०००, २००८, २०१२, २०१८ आनी २०२२ वर्सा ही सर्त जिखल्या. भारता उपरांत सगळ्यांत चड खेपे ऑस्ट्रेलियेन ही सर्त जिखल्या. १९८८, २००२, २०१० वर्सा ऑस्ट्रेलियेन ही सर्त जिखली. पाकिस्तानान २००४ आनी २००६ वर्सा संवसारीक सर्त जिखली. बांगलादेशान २०२० वर्सा, दक्षीण आफ्रिकेन २०१४ वर्सा, वेस्ट इंडीज २०१६ वर्सा आनी इंग्लंडान १९९८ वर्सा ही सर्त जिखली. भारत हे सर्तींतली पयली मॅच बांगलादेशा आड खेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
