भांगरभूंय | प्रतिनिधी
भारत आनी दक्षीण आफ्रिका ह्या पंगडां मदीं कोलकातांत चालू आशिल्ली पयली टॅस्ट सामकी उमळशीक वाडोवपी स्थितींत पावल्या.
बॉलरांचे उत्कृश्ट बॉलिंगे नेटार दक्षीण आफ्रिका पंगडान भारताचो पयलो डाव फकत 189 धांवड्यांचेर आडायिल्लो. ते उपरांत भारताच्या स्पिनरांनी दुसऱ्या डावांत दक्षीण आफ्रिकेचो डाव गडगडावन उडयलो.
दुसऱ्या दिसाचो खेळ सोंप मेरेन दक्षीण आफ्रिका पंगडान 7 विकेटी व्हगडावन 93 धांवड्यो केल्ल्यो. टेम्बा बवुमा 29 आनी कॉर्बिन बॉश एक धांवडी करून खेळपट्टीचेर आशिल्लो. तांचे कडेन फक्त 63 धांवड्यांची आघाडी आसा.
दुसऱ्या दिसाचो खेळ सुरू जालो त्या वेळार लोकेश राहुल (39) आनी वॉशिंग्टन सुंदर (29) हांणी पयल्या अर्द वराच्या खेळांत सादूरतायेन बॅटींग केली. हे मजगतीं, वॉशिंग्टनान कव्हराच्या वयल्यान एक उत्कृश्ट सको लेगीत मारलो. पूण ताका व्हड खेळी करपाक जमली ना. सायमन हार्मरान दिसांतले पयले ओव्हरींत वॉशिंग्टनाक बाद केलो. ते उपरांत मुखेली शुभमन गिल आपल्या डावांतले तिसऱ्या बॉलाचेर हार्मराक स्लॉग स्वीप करून चवको मारलो. ते उपरांत तो रोखडोच संकश्टांत सांपडलो. गिलान शॉर्ट मारल्या उपरांत ताणें रोखडीच मानेक घट धरली. ताका खूब दुखताले. फिजियो मैदानांत येवन ताचेर उपचार लेगीत केलो. पूण, ताचो गिलाक फायदो जालो ना आनी अखेरेक ताणें मैदान सोडलें. गिल परतून खेळपाक येवचो ना अशें दिसतालें. ऋषभ पंतान 24 धांवड्यांचे बॅटिंगेंत दोन चवके आनी दोन सके मारले. पूण, ताका व्हड खेळी करपाक जमली ना. हे मजगतीं, ताका एक जीवनदान लेगीत मेळ्ळें. स्लिपांत एडेन मार्करमान ताची कॅच सोडली. ते पयलीं मार्करमान केशव महाराजाच्या बॉलाचेर स्लिपांत राहुलाची उत्कृश्ट कॅच धरिल्ली.
रवींद्र जडेजान खूब वगत खेळपट्टीचेर तग धरून रावलो. पूण, ताका लेगीत धांवड्यो करप कठीण जाल्लें. 27 धांवड्यांचेर तो हार्मराच्या बॉलाचेर एलबीडब्ल्यू बाद जालो. फाटल्या कांय पयले श्रेणीच्या मॅचींनी व्हड खेळी करपी ध्रुव जुरेल लेगीत फक्त 14 धांवड्यो करपाक शकलो. दक्षीण आफ्रिके वतीन हार्मरान उत्कृश्ट बॉलींग घाली. ताच्या टर्न जावपी बॉलांक तोंड दिवप भारताच्या बॅट्समनांक कठीण जातालें. ताणें चार आनी यानसनान तीन विकेटी घेवन भारताचो डाव 189 धांवड्यांचेर आडायलो. गिल बॅटिंगेक आयलो ना आनी भारताचो डाव 9 विकेटी पडल्या उपरांत सोंपलो. अशे तरेन भारताक फक्त 30 धांवड्यांची आघाडी मेळ्ळी.
दक्षीण आफ्रिकेच्या बॅट्समनांनी दुसऱ्या डावांत लेगीत सादारण बॅटींग केली. पयल्या स ओव्हरी मेरेन धैर्यान बॅटींग केल्या उपरांत सातवे ओव्हरींत रिकलटनाक कुलदीप यादवान आपल्या जाळांत आडकयलो. ते उपरांत रवींद्र जडेजाच्या जाळांत आफ्रिकेचे बॅट्समन घुस्पत गेले. पळयता पळयता तांचो स्कोर 5 बाद 60 जालो. मुखेली टेम्बान एक बाजू सांबाळून धरिल्ली. ताका लेगीत सहज बॅटींग करप कठीण जातालें.
दुसऱ्या आनी तिसऱ्या सत्रांत 6-6 विकेटी पडल्यो. स्पिनरांक जे तरेन हे खेळपट्टींतल्यान मजत मेळ्ळा ती पळयली जाल्यार 120 धांवड्यांची मोख लेगीत मॅचींत उमळशीक हाडपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
