दक्षीण आफ्रिका फायनलींत

भांगरभूंय | प्रतिनिधी

बायलांचे संवसारीक टी-20 क्रिकेट सर्तीचे दुसरे सेमी फायनलींत दक्षीण आफ्रिका पंगडान इंग्लंड पंगडाक हारयलो. निमाणे ओव्हरींत इंग्लंडाक जैता खातीर 13 धांवड्यांची गरज आशिल्ली. दक्षीण आफ्रिकेची बॉलर शबनीम इस्मायल हिणें फकत स धांवड्यो दिल्यो आनी अशे तरेन ताचो पंगड स धांवड्यांनी जिखून पयले खेपे फायनलींत पावलो.

दक्षीण आफ्रिका 26 फेब्रुवारीक ऑस्ट्रेलिये आड फायनलींत खेळटलो. बिरेस्तारा जाल्ले पयले सेमी फायनलींत ऑस्ट्रेलियेन भारताक पांच धांवड्यांनी हारयिल्लो.

मजगतीं, दक्षीण आफ्रिकेन टॉस जिखून पयलीं बॅटींग करपाचो निर्णय घेतलो. ओपनर लौरा वॉल्वार्ट आनी ताजमीन ब्रिट्स हांणी 82 बॉलांनी 96 धांवड्यांची भागिदारी केली. वॉल्वार्ट 53 धांवड्यो करून बाद जाली. ब्रिट्सान उपरांत मारिजन कॅप हिच्या वांगडा मेळून 25 बॉलांनी 46 धांवड्यांची भागिदारी केली. ब्रिट्स 68 धांवड्यो केल्यो. कॅप अखेरच्या ओव्हरींनी व्हड शॉर्ट्स खेळून 13 बॉलांनी 27 धांवड्यो करून नाबाद रावली.

आफ्रिकेन चार विकेटी वगडावन 164 धांवड्यो केल्यो. इंग्लंडा वतीन सोफी एक्लेस्टनान 21 धांवड्यो दिवन 3 विकेटी घेतल्यो. लॉरेन बेलान एक विकेट मेळयली.

165 धांवड्यांचो फाटलाव करपी इंग्लंडाक सोफिया डंकली आनी एलीस कॅप्सी हांणी आक्रमक सुरवात करून दिली. पूण, 53 धांवड्यांचेर दोगांय बाद जालीं. तांकां शबनीम इस्मायलान बाद केलीं. डॅनी व्याटान उपरांत नेटली सिवर वांगडा मेळून डाव सांबाळ्ळो. 85च्या स्कोराचेर व्याट 34 धांवड्यो करून बाद जाली.

सिवरान उपरांत हिथर नायटा वांगडा मेळून 47 धांवड्यांची भागिदारी केली. पूण, 17वे ओव्हरींत सिवर बाद जाली.

इंग्लंडाक 18 बॉलांनी 26 धांवड्यांची गरज आशिल्ली. मुखेली नायट हिच्या वांगडा एमी जोन्स आशिल्ली. आयाबोंगान खाकान पयल्या बॉलाचेर जोन्साची विकेट घेतली. फुडल्या तीन बॉलांचेर तीन धांवड्यो आयल्यो. पांचव्या आनी सव्या बॉलाचेर दोन विकेटी मेळयल्यो. ताणें फकत तीन धांवड्यो दिवन 18वे ओव्हरींत 3 विकेटी घेतल्यो.

इंग्लंडाक 12 बॉलांनी 25 धांवड्यांची गरज आशिल्ली. नायटान 19वे ओव्हरींत 12 धांवड्यो केल्यो. आतां निमाणे ओव्हरींत 13 धांवड्यांची गरज आशिल्ली. नायट तिसऱ्या बॉलाचेर बोल्ड जाली. शबनीम इस्मायलान हे ओव्हरींत स धांवड्यो दिवन आपल्या पंगडाक पयले खेपे फायनलींत सुवात मेळोवन दिली.