दक्षीण आफ्रिका जैताच्या हुमऱ्यार

भांगरभूंय | प्रतिनिधी

मुखेली टेम्बा बवुमा आनी एडेन मार्करम हांचे बॅटिंगे नेटार दक्षीण आफ्रिका पंगडान संवसारीक टॅस्ट वस्तादपण सर्तीचे फायनलींत ऑस्ट्रेलिया पंगडा आड जबरदस्त पुनरागमन केलें.

काल तिसऱ्या दिसाचो खेळ सोंपलो त्या वेळार 282 धांवड्यांचे मोखीचो फाटलाव करपी दक्षीण आफ्रिका पंगडान 2 विकेटी व्हगडावन 213 धांवड्यो केल्यात. जैता खातीर तांकां आनीक 69 धांवड्यांची गरज आसा. मार्करम 102 धांवड्यांचेर आनी बवुमा 65 धांवड्यांचेर खेळटा. दोगांयनी तिसरे विकेटी खातीर अजून मेरेन 232 बॉलांनी नाबाद 143 धांवड्यांची भागिदारी केल्या. रायन रिकेल्टन 6 आनी वियान मुल्डर 27 धांवड्यो करून बाद जाले. दोगांकूय मिचेल स्टार्कान बाद केले.

ते आदीं ऑस्ट्रेलिया पंगडान आपलो दुसरो डाव 8 बाद 144 धांवड्यां वयल्यान मुखार खेळपाक सुरवात केली आनी जेवणाच्या विसवा मेरेन 207चेर ऑलआवट जालो. स्टार्कान नाबाद 58 धांवड्यो केल्यो. एलेक्स कॅरीन 43 आनी मार्नस लाबशेनान 22 धांवड्यो केल्यो. कगिरो रबाडान 4 जाल्यार लुंगी एनगिडीन 3 विकेटी घेतल्यो.

ऑस्ट्रेलिया पंगडान पयल्या डावांत 212 जाल्यार दक्षीण आफ्रिका पंगडान 138 धांवड्यो केल्ल्यो. अशे तरेन ऑस्ट्रेलियेक पयल्या डावाच्या आदाराचेर 74 धांवड्यांची आघाडी मेळिल्ली.