भांगरभूंय | प्रतिनिधी
गोंयांत कोंकण रेल्वे मार्गार आनीक तीन रेल्वे स्टेशनांचो करतले विचार
मडगांव: गोंयांतल्या कोंकण रेल्वे सयत दक्षीण अस्तंत रेल्वे विभागा खातीर केंद्रीय अर्थसंकल्पांत 482 कोटी रुपया मंजूर जाल्यात. गोंयांत रेल्वेची 5696 कोटींचे रेल्वे ट्रॅक, दोट्टीकरण, स्टेशन उबारप अशीं विवीध विकासकामां सुरू आसात. कोंकण रेल्वे वेलें दोट्टीकरण, विद्युतीकरणाचीं कामां हीं कोंकण रेल्वे म्हामंडळा कडल्यान सुरू आसात अशी म्हायती रेल्वे अधिकाऱ्यांनी दिली. तशेंच गोंयांत सां जुझे दी आरियाल स्टेशन फुडल्या दोन वर्सांत पुराय जातलें, जाल्यार नेवऱ्यां आनी मयां स्टेशनां उबारपाचो विचार करतात अशेंय तांणी सांगलें.
मडगांवां कोंकण रेल्वेच्या सभाघरांत केंद्रीय रेल्वे मंत्री अश्विनी वैष्णव हांणी व्हिडियो कॉन्फरन्सिंगा वरवीं पत्रकार परिशद घेतली. ह्या वेळार विवीध विभागाचे रेल्वे अधिकारी हातूंत वांटेकार जाल्ले.
मडगांवच्या पत्रकार परिशदे वेळार नियोजन आनी वेवसाय विभागाचे वेवस्थापकी संचालक जोसेफ जॉर्ज, वरिश्ठ जनसंपर्क अधिकारी बबन घाटगे, पीआयबीचे संचालक नाना मेश्राम हाजीर आशिल्ले.
केंद्रीय मंत्री अश्विनी वैष्णव हांणी सांगलें, केंद्रीय अर्थसंकल्पांत 2025-26 खातीर रेल्वे खातीर 2,52,200 कोटी रुपयांची तरतूद केल्या. नवे रेल्वे ट्रॅक उबारपा खातीर 32,235.24 कोटी, गेज कन्व्हर्जना खातीर 4550 कोटी, रोलींग स्टॉका खातीर 57,693 कोटी, रेल्वे दोट्टीकरणा खातीर 32 हजार कोटी, सुरक्षा उपाय येवजण्यां खातीर 1,16,514 कोटी, रेल्वे पुलांचे उबारणे खातीर 7 हजार कोटी, रेल्वे रूळ नुतनीकरणा खातीर 22,800 कोटींची तरतूद केल्या. रेल्वे कडल्यान 17500 नवे नॉन एसी कोच निर्मिती करतले.
एलएचबी कोचा बदला आयसीएफ कोचाची वेवस्था करतले. पयली वंदे भारत स्लिपर कोच रेल्वेची निर्मिती केल्या आनी ताची चांचणी करतात. तशेंच वंदे भारताचे 200 कोच आनी अमृत भारत रेल्वेचे 100 नॉन एसी कोचाची निर्मिती करतले अशें वैष्णव हांणी सांगलें.
गोंया विशीं उलयतना कोंकण रेल्वे कॉर्पोरेशन हें म्हामंडळ आसा. दक्षीण अस्तंत रेल्वे खातीर 482 कोटींची तरतूद केल्ल्याचें वैष्णव हांणी सांगलें.
सां जुझे दी आरियाल स्टेशन
दोन वर्सांत करतले पुराय
केंद्रीय रेल्वे मंत्री अश्विनी वैष्णव हांचे कडेन संवाद जाले उपरांत कोंकण रेल्वे विशीं म्हायती दितना रेल्वे अधिकाऱ्यांनी सांगलें, व्हड प्रकल्पांत इक्विटीच्या स्वरुपांत केंद्रीय निधी मेळटा, पूण कोंकण रेल्वे कडल्यान आपल्या मार्गा वेलें रेल्वे दोट्टीकरण आनी विद्युतीकरण करतात. कोंकण रेल्वे मार्गा वेल्या प्रवाशांक बरी सेवा दिवपा खातीर गोंयांत सां जुझे दी आरियाला सयत नेवर्यां आनी मयां हांगा तीन स्टेशनां उबारपाचो विचार सुरू आसा. तातूंतलें सां जुझे दी आरियाल स्टेशनाचें काम सुरू आसून फुडल्या दोन वर्सांत तें पुराय जातलें अशें सांगलें. तशेंच अमृत भारत येवजणे खाला मडगांव स्टेशनाचें काम करतले अशेंय तांणी सांगलें.
दोन वर्सांत जातलें पुराय
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
