दक्षीणेंत हावजी घालता लोकांक भूल
भांगरभूंय | प्रतिनिधी
लाखांचीं इनामां मेळोवपाचे आशेन लोकांच्यो घिट्टी
मडगांव : हावजी वा तांबोला ह्या खेळाचा वापर सर्त आयोजीत करून गर्दी एकठांय करपा खातीर जाता. मात, आतां हावजीक मेळपी प्रतिसाद इतलो वाडला, की हे सर्तीचीं इनामां लाखांचीं जाल्यांत. सोशलमिडिया वरवीं तशेंच बॅनर्स उबारून जायरात केल्या. हातूंतलें अर्थकारणूय वाडतूच चल्लां.
दक्षीण गोंयांत सध्या जायत्या सर्तींच्या सुवातांचेर हावजी खेळ खेळटात. सर्तीच्या मदल्या वेळार अंक जाहीर करतात आनी सर्त सोंपले उपरांत फुल्ल हावजीचे नंबर जाहीर केल्ल्यान सर्ती खातीर प्रेक्षकांची गर्दी जाल्ल्याचें दिसता. दक्षीण गोंयांत म्युझिकल शो, फुटबॉलच्यो सर्ती, कराओके सर्त अश्या कार्यावळींत आवजींची क्रेझ बरीच वाडल्या.
हावजी खातीर गर्दी जाल्ल्यान हेर प्रकार जरी वाडल्यात तरी हातुंतल्या लाखांनी अर्थकारणाचेर प्रस्न निर्माण जाल्यात. एक हजार रुपयांक तीन तिकीटी अश्या दरान विक्री करतात. सर्तीच्या मदीं नंबर जाहीर करीत सर्त सोंपली काय रोखडीच इनामांचो दर जैतिवंतांच्या हातांत मेळटा. हाका लागून हांगा गर्दी दिसून येता.
रोख इनामां, सर्ती खातीर थारावीक परवानग्यो आनी व्हडा प्रमाणांत मेळपी परतावो, हाका लागून हावजीची क्रेझ आयोजकांक तशेंच वांटेकार जाल्ल्या नागरिकांक ओगी बसपाक दिना. जंय हावजी आसता थंय गर्दी जावपाक लागिल्ल्यान ह्या खेळांच्या लाखोंच्या इनामांच्या दराचेर अर्थकारणान लक्ष ओडलां.
सध्या नावेलेच्या मंडळान कोंकणी म्युझिकल शो खातीर सुपर ग्रँड हावजीची घोशणां केल्या. हे खातीर वट्ट इनामांची रक्कम १५ लाखांची आसा. बाणावले १३ मार्चाक धा लाख, १४ मार्चाक ६ लाख जाल्यार नावेले १० लाखांचे हावजीचें आयोजन केलां. उण्या वेळांत लाखांनी रुपया मेळोवपाचे आशेन जायते जाण तिकीट घेतात. विशेश म्हळ्यार मेळिल्ल्या पयशांतल्यान कराचो दरूय सोडी नाशिल्ल्यान लोकांचो प्रतिसाद वाडला. हावजी वा तांबोला हो नंबरचो खेळ. हातूंत १ ते ९० नंबरांचो आसपाव आशिल्ल्यान फकत १५ नंबर आशिल्ले कुपन्स वांटेकारांक दितात. उपरांत आयोजक लकी ड्रॉ प्रमाण नंबर काडून जाहीर करतात आनी नागरीक आपल्या तिकेटीचेर तो नंबर सोदून ताचेर काट मारीत आसतात. टॉप लायन, मिडल लायन, बॉटम लायन हाचे सयत जल्दी फायव्ह आनी फुल्ल हावज अशे प्रकार आसतात, हातूंत जल्दी फायव्हाक लोक चड पसंद करतात.
खेळटल्यांक, कलाकारांकूच अर्थीक मजत- आयोजक
आयोजकांच्या म्हणण्या प्रमाण, सर्तीचे सुवातेर प्रेक्षकांचे हजेरी खातीर हावजींचो वापर करतात. आयिल्ल्या प्रेक्षकां खातीर मनोरंजनाचे साधन म्हणूनय हाचे कडेन पळयतात. हातूंतल्यान जे पयशे मेळटात, ताचो वापर खेळाक, खेळतल्यांक उर्बा दिवपा खातीर, म्युझिकल शोचा खर्च काडून कलाकारांक मात्शी अर्थीक मजत दिवपाक करतात. हाका लागून गरजेच्यो परवानग्यो जिल्लोधिकारी आनी पुलीस प्रशासना कडल्यान घेतात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
