भांगरभूंय | प्रतिनिधी
भाजपाची नवी चाल; क्रिस्तांव समाजाच्या मतांचें गणीत
भांगरभूंय । प्रतिनिधी
पणजीः दक्षीण गोंयची मदार हे खेपेय क्रिस्तांव समाजांतल्या मतदारांचेर निंबून आशिल्ल्यान तशेंच काँग्रेसी वतीन परतून सध्याचे खासदार फ्रान्सीस सार्दीन हांकांच उमेदवारी दिवपाची शक्यताय आशिल्ल्यान भाजपान नवी चाल खेळपाक सुरवात केल्या. हे खेपे दक्षीण गोंयची उमेदवारी येरादारी मंत्री मॉवीन गुदिन्हो हांकां दिवपाचो विचार पक्षान चलयला, अशी म्हायती भाजपाच्या एका वरिश्ठ फुडाऱ्यान ‘भांगरभूंय’ कडेन उलयतना दिली.
लोकसभेंतल्या जैताची गणितां दक्षीण गोंयांतल्या क्रिस्तांव समाजाच्या मतांतेर निंबून आसता. ताका लागून विरोधी काँग्रेसी कडल्यान सदांच दक्षीण गोंयांत क्रिस्तांव उमेदवाराक चड प्राधान्य दितात.
भाजपान सुरवेक आदले खासदार नरेंद्र सावयकार, आदले उपमुख्यमंत्री चंद्रकांत कवळेंकार आनी आदले आमदार दामोदर नायक हांचीं नांवां संसदीय समिती कडेन धाडिल्लीं. ते परांत संसदीय समितीच्या निर्देशा प्रमाम कांय महिलांचींय नांवां धाडिल्लीं. पूण ह्या सगळ्यांचीं नांवां फाटीं पडून आतां मंत्री मॉवीन गुदिन्हो हांच्या नांवाचो पक्षान विचार सुरू केला. पूण तेच वांगडा आदले मंत्री निलेश काब्रास हांचेंय नांव चर्चेंत आसा, अशें ह्या फुडाऱ्यान सांगलें. सत्ताधारी भाजप, विरोधी काँग्रेस आनी रिव्हॉल्युशनरी गोवन्स (आरजी) अशे तीन पक्ष लोकसभा वेंचणुकेच्या रिंगणांत देंवल्यात. तातूंत आरजीन रुपर्ट परेरा हांकां आदींच उमेदवारी जाहीर केल्या. काँग्रेसीन खासदार फ्रान्सीस सार्दीन आनी सरचिटणीस विरियातो फर्नांडीस हांचीं नांवां धाडल्यांत. तातूंतलें सार्दीन हांचें नांव निश्चीत जातलें, अशें मानतात. आरजीचे उमेदवार रुबर्ट परेरा हे क्रिस्तांव एसटी आसा. अशे स्थितींत क्रिस्तांव उमेदवार दिलो जाल्यार मतांची विभागणी जातली आनी दक्षीण गोंयांतले चडशे हिंदू आमदार भाजपाचे आशिल्ल्यान चडांत चड हिंदू मतांय भाजपा उमेदवाराक मेळटलीं, अशे तरेचें ‘सोशल इंजिनियरींग’ भाजपान केलां. हेच खातीर संसदीय समिती मॉवीन गुदिन्हो हांच्या नांवाचेर चड विचार करता, अशें ह्या फुडाऱ्यान स्पश्ट केलें.
फाल्यां नांव जाहीर जावपाची शक्यताय
भाजपान उत्तर गोंयची उमेदवारी केंद्रीय मंत्री श्रीपाद नायक हांकां जाहीर केल्या. दुसरी वळेरी बुधवारा जाहीर जातली. तातूंत दक्षीण गोंयच्या उमेदवाराचें नांव जाहीर करतले, अशी म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
