भांगरभूंय | प्रतिनिधी
-प्रदेशाध्यक्ष अमीत पाटकार हांची भाजपाचेर टिका
पणजी: भाजपाच्या दोन ज्येश्ठ आमदारांनी दक्षीण गोंयची सुवात लडोवपाक न्हयकार दिला. हातूंतच भाजपान आपली हार मान्य केल्ल्याचे स्पश्टपणान दिसून येता, असो दावो काँग्रेस प्रदेशाध्यक्ष अमीत पाटकार हांणी केलो.
पणजे काँग्रेस कार्यालयांत शेनवारा घेतिल्ले पत्रकार परिशदेंत ते उलयताले. आदले मुख्यमंत्री तशेंच मडगांवचे आमदार दिगंबर कामत आनी सभापती रमेश तवडकार हांचीय नांवां भाजपा कडल्यान धाडिल्लीं. पूण ह्या दोनूय ज्येश्ठ फुडाऱ्यांनी दक्षीण गोंयांतल्यान लडपाक स्पश्ट न्हयकार दिलो. आपली हार निश्चीत आशिल्ल्यान तांणी हो निर्णय घेतला, अशें पाटकार हांणी म्हणलें.
2019 पसून भाजप 2024 त दक्षीण गोंयची सुवात जिखतले असो दावो करता. अशें आसतनाय भाजपाक पांच वर्सांत दक्षिणेंत उमेदवार मेळूंक ना. सध्या तरी भाजप पुरायपणान गोंदळ्ळा. काँग्रेसच्या भिरांतीक लागून उमेदवार जाहीर करपाक कळावाचे डावपेच खेळटा, अशी टिका तांणी केली.
काँग्रेसच्या सध्याच्या खासदारांनी दक्षीण गाेंयांत जायती कामां केल्यात. दक्षीण गोंयांतल्या लोकांचो काँग्रेसीचेर पुराय विस्वास आसा. भाजप कशे पद्दतीन फूट पाडून राज्य करपाचो यत्र करता, हे लोकांक खबर आसा. ताका लागून लोक परतून इंडिया आघाडीच्या उमेदवाराकूच जैतिवंत करतले, असो विस्वास तांणी उक्तायला.
………………………..
सरकारी नोकऱ्यांचें आस्वासन पुराय करतले
येवपी लोकसभा वेंचणुकेंत इंडिया आघाडीची सत्ता आयल्यार देशभरांतल्या तरणाट्यां खातीर 30 लाख कायम स्वरूपी सरकारी नोकऱ्यो दिवपाचें आस्वासन काँग्रेस फुडारी राहूल गांधी हांणी भारत जोडो न्या यात्रेच्या दुसऱ्या टप्प्यांत दिलां. सरकार आयल्यार गोंया सयत देशभरांतल्या तरणाट्यांचे हे सपन सत्यांत देंवतले, अशें अमीत पाटकार हांणी म्हणले. भाजप सरकार फाटल्या 10 वर्सांत रोजगार निर्माण करपांत अपेशी थारिल्ल्याचो आरोप तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
