भांगरभूंय | प्रतिनिधी
द क्षिणेचो देव म्हणून वळखतात, तो सुपरस्टार रजनीकांत आयज आपलो 75 वो वाडदीस मनयता. चार वर्सां आदीं सुपरस्टार रजनीकांताक चित्रपट मळावयलो सगळ्यांत व्हडलो भोवमान म्हणल्यार दादासाहेब फाळके पुरस्कार दिल्लो. 67व्या राश्ट्रीय चित्रपट पुरस्कार सुवाळ्यांत तेन्नाचे उपाध्यक्ष वेंकैया नायडू आनी केंद्रीय मंत्री अनुराग ठाकुर हांणी तांकां हो भोवमान भेटयिल्लो. हालींच जाल्ले इफ्फीक रजनिकांत आयिल्लो. ताका हाचे आदीं पद्मभूषण (2000) आनी पद्मविभूषण (2016) ह्या किताबांनी भोवमानीत केला.
जिवो आसतानाच आख्यायिका जाल्लो रजनीकांत हो असामान्य व्यक्तीमत्व. रजनीकांताच्या नांवान जायते विनोद, थोमणे, उपदेश, म्हणी, मीम्स लोकप्रीय आसात. रजनीकांताचे हजारांनी फॅन क्लब देशांत आनी परदेशांत आसात. तो इतलो लोकप्रीय की रजनीकांता विशीं वायट उतर वापरल्यार लेगीत तमिळनाडूंत मार पडपाची शक्यताय. इतलेंच न्हय तर दंगल पसून जावं येता. ताचे इतली लोकप्रियता खंयच्याच अभिनेत्याक मेळूंक ना.
ताचे चित्रपट प्रदर्शीत जावचे पयलींच लेगीत सुपरहिट आसात. ताच्या फिल्मांची तिकीट घेवपा खातीर प्रेक्षक सकाळ फुडें उठून रांक लायतात. ताच्या फोटवांचेर ते दुदाचे अभिशेक करतात. तमिळनाडूंत ताचेखातीर देवळां आसात. लोक ताची देवावरी पुजा करतात.
रजनीकांताचो जल्म 12 डिसेंबर 1950 दिसा बेंगळुरूच्या मराठी कुटुंबांत जालो. ताचें खरे नांव शिवाजीराव गायकवाड, बापायचें नांव रामोजीराव गायकवाड आनी आवयचें नांव जिजाबाई. ताचो मूळ गांव पुरंदर तालुक्यांतलो मावडी-कडेपठार. ताचें घराणें 80- 90 वर्सां आदीं बेंगळुरूक स्थलांतरीत जावन थंय स्थायीक जाल्लें. ताचो बापूय कर्नाटक पुलिशेंत हवालदार आशिल्लो. रजनीकांताक भुरगेपणा सावन अभिनयाचें पिशें आशिल्लें. अभिनयाचें इत्सा जिवी दवरून ताणें जायतीं ल्हान ल्हान कामां केलीं. बारावी पास जाले उपरांत कांय काळ ताणें बस कंडक्टर म्हणूनय काम केलें. आपलें नशीब आजमावपा खातीर ताणें मद्रास फिल्म इन्स्टिट्यूटांत नांव नोंद केलें आनी…. फिल्म उद्देगाक सुपरस्टार मेळ्ळो.
‘अपूर्ण रागंगल’ ह्या तमिळ चित्रपटांतल्यान ताणें आपले चित्रपट कारकिर्दीची सुरवात केली. आतां मेरेन ताणें 150 परस चड चित्रपटांनी अभिनय केला. ताणें बॉलिवूडांत पदार्पण केलें ‘अंधा कानून’ ह्या चित्रपटांतल्यान. फकत तमिळ आनी हिंदींत न्हय तर कन्नड, तेलुगू, बंगाली, इंग्लीश चित्रपटांनी ताणें अभिनय केला. ताच्या अभिनय कारकिर्दींत हालींच पांच दशकां पुराय जाल्यांत. पांच दशकां सावन आपल्या अभिनयान चित्रपट मळार शेख गाजोवपी रजनीकांत आपल्या अभिनया वांगडाच डॅशिंग स्टायल आनी स्टंटां खातीरय वळखतात. तरणाटे ते जाण्टे सगळेच ताचे फॅन. प्रेक्षकांची गर्दी ओडून घेवपी दक्षिण भारतीय सिनेमाचो सम्राट आपल्या संवादांक लागून आनी आपले खाशेले शैलीक लागून नामनेक पावला.
दक्षीण भारतांत ताच्या नांवार सगळ्यांत यशस्वी चित्रपट आसात. ताचे फॅन क्लब फकत देशांतच न्हय तर परदेशांतय आसा. जपानांत ताचो व्हडलो फॅन क्लब आसा. थंय ताचे चित्रपट चड लोकप्रीय आसात. थंय ताचे फॅन क्लबूय आसात. गिनीज बुक ऑफ वर्ल्ड रेकॉर्डांत ताची सगळ्यांत चड फॅन आशिल्लो अभिनेतो म्हूण नोंद जाल्या. ताका चार फावटीं उत्कृश्ट अभिनेत्याचो पुरस्कार मेळ्ळा.
रजनीकांत नट म्हणून जितलो व्हड तितलोच मनीस. आपल्या वट्ट मानधनांतल्यान 40 टक्के पगार समाजसेवे खातीर तो वापरता. रजनीकांत हो एकलोच अभिनेतो जो एकाय उत्पादनाची जायरात करीना. लोकांक कसलोच चुकीचो संदेश वच्चो न्हय असो एकूच हेतू ताचे फाटल्यान आसा. तो आयज पसून सामको सादो रावता. मेकअप, प्लास्टिक सर्जरी करून भोवना. कोणाय मदीं मिसळटा. हालींच इफ्फींत आयिल्लो तेन्ना रसिकांक ताच्या सभावाचें दर्शन जालां.
जिवो आसतनाच आख्यायिका जाल्ल्या ह्या सुपरस्टाराक वाडदिसाचीं परबीं!
श्याम ठाणेदार
99225 46295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
