भांगरभूंय | प्रतिनिधी
पणजी : काँग्रेसीचे म्हालगडे फुडारी, पयले केंद्रीय गृहमंत्री स. सरदार वल्लभभाई पटेल हांचे जयंतीच्या निमतान राज्यांत 27 ऑक्टोबर ते 2 नोव्हेंबर ह्या काळांत दक्षता जागृती सप्तकाचें आयोजन जातलें. सगल्या खात्यांनी दक्षते विशीं प्रतिज्ञा घेवपा वांगडा जागृताय कार्यावळीचें आयोजन करप बंधनकारक आसतलें. दक्षता संचालक अमरसेन राणे हांणी ह्या विशयाचें परिपत्रक जारी केलें.
सप्तका निमतान केल्ले उपक्रम तशेंच कार्यावळीचो अहवाल खातें मुखेल्यांणी 20 नोव्हेंबर पयलीं सादर करप सक्तीचें आसा.
‘दक्षता : आमची सामूहीक जापसालदारीक’, हे संकल्पनेचेर आदारीत दक्षता सप्तक मनयतले. थळावी स्वराज संस्था, स्वायत्त संस्था तशेंच कार्यालयांनी 15 नोव्हेंबर मेरेन चडांत चड कागाळी निकालांत काडच्यो. कर्मचार्यांची तांक वाडोवपी उपक्रम तशेंच डिजीटल स्वरूपाच्यो सुधारणा करच्यो, अशें परिपत्रकांत नमूद केलां.
भ्रष्टाचारा आड जागृती करपा खातीर मॅराथॉन, वॉकथॉन, पथनाट्याचें आयोजन करचें. जागृताये खातीर व्हडा प्रमाणांत समाज माध्यमांचो वापर करचो, अशे आदेश खात्यांक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
