भांगरभूंय | प्रतिनिधी
गोंय कोयर वेवस्थापन मंडळाची खोर्ले कारवाय
भांगरभूंय । प्रतिनिधी
पणजी : गोंय कोयर वेवस्थापन म्हामंडळान तिसवाडी- खोर्ली अंमलबजावणी मोहिमे खाला कोयर उडोवपी एका मानायाक धरलो. पूण दंड भरपाक ताचे कडेन पयशे नाशिल्ल्यान उडयिल्लो सगलो कोयर नितळ करपाची ख्यास्त दिली.
गोंय कोयर वेवस्थापन महामंडळान पोरणें गोंय पुलीस, गोंय प्रदुशण नियंत्रण मंडळ, तिसवाडी गट उदरगत अधिकारी आनी खोर्ली पंचायतीचे सचीव हांच्या जोडपालवान खोर्ली रस्त्या कुशीक बेकायदो उडोवपी कोयराचेर नियंत्रण हाडपा खातीर अंमलबजावणी मोहीम हातांत घेतिल्ली.
हे मोहिमे वेळार कुशीचे कंपनीचो एक मानाय रस्त्या कुशीक कोयर उडयतना नदरेक आयलो आनी अधिकाऱ्यांनी ताका जुस्त धरलो. उपरांत ह्या मानायाक 2500 रुपयांचो दंड भरपाक सांगलो. पूण दंड भरपाक पयशे ना अशें कारण मानायान सांगलें, अशी म्हायती अधिकाऱ्यान दिली.
उपरांत ताका दंड दिवचे सोडून आमी कारवाये वरवीं जागृताय करपाचें थारायलें. ताणें जे सुवातेर कोयर उडयल्लो तो सगळो कोयर नितळ करून तो पोतयांनी भरून ती सुवात निवळ करपाक सांगली. आमचे रस्ते हे कोयर उडोवपाची सुवात न्हय, असो स्पश्ट संदेश हे कारवायेंतल्यान गेला. आपले सरभोंवतणचो वाठार नितळ दवरप ही सगल्यांची जापसालदारकी, हाचो घट उगडास उरतलो, अशें अधिकाऱ्यान सांगलें. हे कारवायेंत गोंय कोयर वेवस्थापन महामंडळाचे सहाय्यक वेवस्थापक गजानन कामत, अभियंते विश्वेन सावंत आनी प्रणव नगर्सेकार, गोंय प्रदुशण नियंत्रण मंडळाचे अभियंते लिस्टन फर्नांडीस, पोरणें गोंयचे उपनिरिक्षक मनोहर धुळापकार, कॉन्स्टेबल पांडुरंग नायक आनी भास्कर मडकयकार, तिसवाडीचे गट उदरगत अधिकारी अनिल धुमसकार आनी खोर्ली पंचायतीचे सचीव विधूर फडते उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
