भांगरभूंय | प्रतिनिधी
अादले पिळगे परस हालींची पिळगी शिटूक अशें म्हणटात. अत्याधुनीक साधन- सुविधा, उच्च शिक्षण हीं ताचे फाटलीं कारणां खंय. तातूंत तथ्य आसाच अशें ना. मात, आदल्या तेंपा वयले पिळगे मुखार आयचे सारकीं आव्हानां नाशिल्लीं. अशिक्षीत आसली तरी तिका कितें बरें, कितें वायट हाची जाण आशिल्ली. ते पिळगेक मनीस वळखूंक कळटाले. ती सुवार्थी, वसवशिल्लीय नाशिल्ली. कश्ट करून मेळटा ताचेर प्रामाणीकपणान जगपाचेर तिचो भर आशिल्लो. तेन्ना लोकांच्यो गरजोय उण्यो आशिल्ल्यो. अर्थात सगलेच तशे नाशिल्ले. थोडे धूर्त, बिलंदर, तोपी मास्टरूय आसले. आयचे पिळगे मुखार सगल्यांत व्हडलें आव्हान आसा तें ठकसेनांचें, फटिंगांच्या पांयचें. तांकां मोबायल फोन आनी ताचे वयली सोशल मिडिया बऱ्याक पडल्या. व्हाॅट्सअॅपा वरवीं वा फोन करून हे ठकसेन विचार करपाची कुवत नाशिल्ल्या आनी पयशांक भुलपी अपुरबुद्दांक सोंपेंपणी फटयतात. हालींच गोंयांत असल्यो बऱ्योच घडणुको घडल्यात.
सगलेच न्हय, पूण चडशे लोक जादा व्याज, पयशे म्हणले काय रोखडेच भुल्लुसतात. हालींच शॅर बाजारांत जादा मोबदलो दिवपाचें हांयस दाखोवन पर्वरे एकल्याक 35 लाख 64 हजार रुपयांक फटयला. पुलिसांनी केरळांत वचून मुहंमद हाजीश जलील ह्या 26 वर्सांच्या तरणाट्याक धरला. ताच्या बँक खात्यांत 1 कोटी 11 लाख रुपया मेळ्ळ्यात. ताणें कितलो व्हडलो हात मारला आसतलो, हाची कल्पना करात. हें एक प्रकरण. हाचे पयलीं गुन्यांव केल्यात जाल्यार ते वेगळे. तपासा उपरांत ते उक्तडार येतलेंच. टेलिग्राम आनी हेर माध्यमांच्या आदाराचेर ताणें पर्वरेकारा कडेन संपर्क केलो आनी शॅर बाजारांत पयशे घाल्यार आपूण चड मोबदलो मेळोवन दितां, अशें हांयस दाखयलें. मागीर एक अॅप डावनलोड करपाक सांगलें. साबार बँकांच्या खात्यांनी पयशे घालपाक सांगलें. कांय काळांत ताका ब्लाॅकूच केलो. कागाळदार आतां पुलिशेंत गेला. ताणें भरिल्ले पयशे मल्लापुरम – केरळांत काडिल्ल्याचें कळटकच गोंय पुलिसांनी थंय वचून बँकेंत चवकशी केली आनी जलील सांपडलो. फक्त गोंयांतूच न्हय, तर पांच राज्यांनी ताणें हीच युक्त वापरून लोकांक फटयल्यात. आनीक एक घडणूक घडल्या. तीय कागाळ सायबर क्रायमा कडेन पावल्या. शॅर बाजारांत गुंतवणूक करपाक सांगून एके बायलेक 13 लाख रुपयांक फटयल्या. असलें प्रकरण घडलें काय लोकांनी https:// cybercrime.gov.in हे वॅबसायटीचेर वचून रोखडीच कागाळ करपाक जाय. थळावे पुलीस, सायबर गुन्यांव विभागाक कळोवपाक जाय.
हे गुन्यांवकार पयलीं म्हयनोभर दोब्रात व्याज दितात. तुमचो विस्वास बसलो काय मागीर लाख धाडपाक सांगतात आनी एक दीस सोशल मिडिया अकावंटूच ब्लाॅक करून फुज्ज्यो काडटात. लोगो क्लीक करून वा स्क्रॅच कार्ड खरपून 700 रुपया मेळयात, केव्हायसी अपडेट करात, सीमकार्ड, एटीएम कार्ड ब्लाॅक जातलें, अशें सांगून ते लुट्टात. चडशे ठकसेन हिंदी उलयतात. तांचे कडेन तुमी कोंकणीत उलयत जाल्यार ते गडबडटात. फोन कट करतात. ह्या सायबर गुन्यांवकारांचें एक खाशेलपण म्हणल्यार, तुमची सगली म्हायती ताका आसता. तुमच्या भुरग्यांचीं नांवां, शाळे सयत. ती तांकां कशी मेळटा हो संशोधनाचो विशय. आतां मेळत थंय मोबायल फोन नंबर जोडपाची सक्ती जाता, ताचोय हो घडये परिणाम आसुये.
आनीक एक गजाल, खऱ्यो बँको, संस्था, म्हामंडळांचे लोगो, फोन नंबर आशिल्लें हुबेहुब लेटर हेड, जायरात हे ठकसेन तयार करतात. ईमेलूय तोच, फक्त मदीं ओ च्या जाग्यार शुन्य वा कॅपिटल अक्षराच्या जाग्यार ल्हान अक्षर. म्हणटकच तुमी ईमेल करतकच तो ठकसेनाचे टोळयेक वता. कंबोडियाक भारतीयांक चड पगार दिता अशें सांगून व्हेल्ले, थंयूय असलेंच काम जातालें, अशी म्हायती उक्तडार आयिल्ली. सगलें तश्याक तश्शें कार्बन काॅपी आसतकच शिटूक, सुशिक्षीत मनीस पसून फटवतलो. तातूंत चड पयशांचे आशेन दोळे धांपून 10, 20, 40, 50 लाखां वयर पसून गुंतोवपी गोंयकार आसात. हो इतलो पयसो आसा जाल्यार समाजीक काम करूं येता वा स्वताचो वेवसाय वाडोवं येता, नवो सुरू करूं येता. कोणें सोशल मिडियाचेर कितेंय करपाक सांगलें, जाल्यार पयलीं संबंदीत अर्थीक संस्था, बँकेच्या फांट्याक फोन करचो वा प्रत्यक्ष थंय वचून चवकशी करची. कांय बँकांतले कर्मचारी टार्गेट पूर्ण करपाक क्रेडीट कार्ड घे म्हूण फोन करीत आसतात, ताकाय लागून ह्या गोंदळांत भर पडल्या. फाल्यां खऱ्या बँक मॅनेजरान फोन केलो आनी खातेदार बँकेंत वचूंक ना, जाल्यार ताका लुकसाण जावंक शकता. कारण फटिंगांचे काॅल, मॅसेज वाचून लोकांचो खऱ्या वयलोय विस्वास उडला! लोकांनी कितेंय करचे पयलीं थोडो तरी विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
