भांगरभूंय | प्रतिनिधी
म्हापशें: पिकेनवाडो कान्सा थिये पोशिल्ल्या एका सुण्याक बिबट्यान व्हरपाची घडणूक घडली. रान कात्यान थंय बिबट्याक धरचे खातीर सापळो लायला. बिबट्यान सुण्याचेर केल्लो हल्लो सीसीटीव्ही कॅमेरांत कैद जाला. हे घडणुकेक लागून लोकां मदीं भिरांत पातळ्ळ्या.
ही घडणूक 1 ऑगस्टाक मध्यानरातीर 3.10 वरांच्या सुमाराक घडली. घराची धनीण सँण्ड्रा डिलिमा 2 ऑक्टोबराक सकाळीं 7 वरांचेर घराचे वासरेर सुण्याक पाव घालपाक आयली तेन्ना तिका थंय सुणो नाशिल्ल्याचें दिसलें. तिणें दोन सुणीं पोसल्यांत. ते उपरांत तिणें घरांतल्या सीसीटीव्ही फुटेज पळयली तेन्ना तिका बिबटो सुण्याक व्हरतना दिसलो.
हे घडणुकेची म्हायती डिलिमान आपल्या शेजाऱ्यांक तशेंच रान खात्याक दिली. ते प्रमाण रान खात्याच्या अधिकाऱ्यांनी घडणुकेचे सुवातेर येवन पळोवणी केली. त्या बिबट्याक बेगिनात बेगीन धरपाची मागणी थळाव्या लोकांनी रान अधिकाऱ्यां कडेन केली. लोकांचे मागणे प्रमाण रान खात्यान बुधवारा राती ह्या वाठारांत सीसीटीव्ही कॅमेरे तशें सापळो लायला. मजगतीं, थिवी हो दोंगराच्या मुळांत आशिल्लो वाठार. दोंगरा वयल्यान बिबटो लोकवस्तींत आयला आसतलो आनी तेच वाटेन परतून गेला आसतलो. नियोजीत खाजगी विद्यापीठ ह्याच दोंगराचेर बांदपाचो सरकाराचो विचार आसा, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
