भांगरभूंय | प्रतिनिधी
पणजी : थियेच्या वट्ट १०,१०० चौ. मीटर क्षेत्रफळ आशिल्ले जमनी विशीं वट्ट १३ सेल डीड्स बेकायदो थारोवन दिवचलच्या प्रथमवर्ग न्यायालयान तीं रद्द केल्यांत. हाका लागून, बनावट कागदपत्रांच्या आधाराचेर जमीन विकत घेवप- विक्री केल्ल्या प्रकरणांत आदीं पसूनच चवकशेक मुखार वचपी सिद्दिकी उर्फ सुलेमान खानाक न्यायालयान बरोच चाबूक दिला.
नेमकें प्रकरण कितें?
मारीया लिबरेटा फोन्सेका हांणी थियेच्या जमनीच्या बेकायदेशीर वेव्हारा विशीं दिवचल पयलो वर्ग न्यायालयांत याचिका दाखल केली. हातूंत तांणी तिच्या घोवाच्या आयजेच्या नांवाचेर जमीन, फटींग कागदपत्रांच्या आधारार एरिक मेंडीस आनी मायकेल आल्वारेसान सिद्दिकी उर्फ सुलेमान खान हाका विकिल्ल्याचे दावे केल्ले. हो वेव्हार २००७ वर्सा जाल्लो. हे विशीं २००८ वर्सा म्हापशें पुलीस स्टेशनांतूय कागाळ नोंद केल्ली.
न्यायाधीश अनुराधा आंद्रादे हांचे मुखार जाल्ले सुनावणे मजगतीं, पावर ऑफ ऍटर्नींत ज्या पांच जाणांच्यो सयो आसा, तांतल्या दोगांक मरण आयिल्ल्याचें निश्पन्न जालें. लुईस मार्टिनो हांकां १९७९ वर्सा आनी ज्योकिम फोन्सेका हाका १९९३ वर्सा मरण आयिल्लें. जाल्यार मारीया व्हिक्टोरिया गोन्साल्विस हांकां १९२४ वर्सा मरण आयिल्ल्यान ती मार्टिनो हांची घरकान्न आशिल्ल्याचो दावो फटींग आशिल्ल्याचेंय निश्पन्न जालें. ह्या वेळार हे वेव्हार तांचे मुखार जावंकूच ना आनी रजिस्टरांतूय ताची नोंद ना. तांच्यो सयोय बनावट आशिल्ल्याच्यो नोटरीन न्यायालयांत सांगलें. ह्याच आदाराचेर सिद्दिकी उर्फ सुलेमान खाना कडेन हे जमनी कडेन संबंदीत कसलोच कायदेशीर हक्क वा मालकी ना हें स्पश्ट जाता, अशें निरीक्षण न्यायालयान नोंद केलें.
मजगतीं, २००७ वर्सा जाल्ली ही १३ सेल डीड्स बनावट पावर ऑफ ऍटोर्नीचेर आदारून आशिल्ल्याचें न्यायालयान स्पश्ट केलें आनी मारीया लिबरेटा फोन्सेका हांचे वटेन निकाल दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
