भांगरभूंय | प्रतिनिधी
धनगर समाजाचो खर विरोधः ‘गोंयचे फुडले पिळगे खातीर’चो तेंको
भांगरभूंय । प्रतिनिधी
म्हापशें: कान्सा थियेच्या प्रस्तावीत खाजगी विद्यापिठाची जमीन ही आमच्या पुर्वजांनी सांबाळून दवरल्या. हे जमनीर कसलेंच खाजगी विद्यापीठ आमकां नाकां, अशें धनगर समाजाच्या वांगड्यांनी स्पस्ट केलें. ह्या धनगर समाजाक गोंयचे फुडले पिळगे खातीर हे स्वयंसेवी संस्थेन तेंको दिला.
बिरेस्तारा सकाळीं धनगरवाड्या वयल्या लोकांनी खाजगी विद्यापिठाच्या विरोधात रॅली काडली. तांकां गोंयचे फुडले पिळगे खातीर हे संस्थेच्या वांगड्यांनी तशेंच थळाव्या लोकांनी तेंको दिलो. हे रॅलींत धनगर समाजांतल्यो बायलो आनी भुरगीं वांटेकार जाल्ल्यो.
कान्सा थियेचे दोंगुल्लेर खाजगी विद्यापिठाक आमचो खर विरोध आसा. आमच्या पुर्वजांनी ही जमीन सांबाळून दवरल्या. थंय तांणी घरां बांदल्यांत. तांची गोरवा- पाडकां आनी हेर जनावरां थंय रावतात, अशें थळाव्या लोकांनी सांगलें.
धनगर समाजाचे उपाध्यक्ष पांडुरंग पाटील हांणी सांगलें, आमकां हे सुवातेर कसलेंच विद्यापीठ नाका. आमकां आमचीं घरां जाय. आमकां गोंयांत खाजगी विद्यापिठाची गरज ना. गोंय विद्यापिठाक खूब संद आसा. मोपा वरींच सरकार हे सुवातेर खाजगी प्रकल्प हाडून आमच्या समाजाचेर अन्याय करपाचो यत्न करता.
गोंयचे फुडले पिळगे खातीर हे संस्थेचे अध्यक्ष जॅक मास्कारेन्हस हांणी सांगलें, 20 ऑक्टोबराक थियेच्या लोकांनी आपली आनी गांवची वळख सांबाळून दवरचे खातीर व्हड संख्येन भायर सरून एकवट दाखयलो हे खातीर तांकां परबीं. आमी सप्टेंबरांत कोमुनिदाद प्रशासकां कडेन संपर्क करून खाजगी विद्यापीठा संबंदांतली कबलात आनी कोमुनिदादीच्या थारावाचो तपशील सादर करपाची विनवणी केल्ली. मात आमकां थिवी कोमुनिदादी कडेन संपर्क करपाक सांगलें. पूण कोमुनिदादी कडल्यान आमकां कसलीच जाप मेळूंक ना. पूण आरटीआयच्या माध्यमांतल्यान आमकां म्हायती मेळ्ळ्या, कबलाती प्रमाण खाजगी विद्यापीठ जमीन बँके कडेन घाणाक दवरपाक शकता. तशेंच ते जर पळून गेले जाल्यार कोमुनिदादीची जमीन लेगीत वतली, अशें मास्कारेन्ह, हांणी सांगलें.
आमान्सियो फर्नांडीस हांणी सांगलें, ही जमीन अविकसीत आनी कांय प्रमाणांत ती लागवडीची जमीन आसा. तिळारी धरणाचें कानाल लागसारच्यान वता, ताका लागून थंय कमांड एरिया आसा. जंय जमीन शेतां खातीर वापरपाक शकतात आनी शेती सोडून हेर गजालीं खातीर परवानगी मंजूर करपाक मेळना. ह्या मुद्द्याचेर कोमुनिदादीन विशेश सभेचें आयोजन करचें, अशें मॉली दा गामा सिल्वा, रॉबर्ट कुलासो आनी हेर लोकांनी मागणी केली.
कोमुनिदादीन गांवकारांक फटयलेः गॉडफ्री डिलिमा
थिये दोंगुल्ले वयले 6.30 लाख चौखण मिटर जमनींतली 2 लाख चौखण मिटर जमीन त्या खाजगी विद्यापिठा खातीर कोमुनिदादीन दिल्या. कोमुनिदादीन ते संस्थेक ही जमीन विकल्या. संस्थेचें नांव लेगीत म्युटेशना वरवीं एक चवदाच्या उताऱ्याचेर लागलां. कबलाती प्रमाण कोमुनिदादीन हे संस्थे कडल्यान 5 कोटी रुपया घेतल्यात, ते परतून दिवपा सारके आसा. तशेंच ही जमीन 1 रुपया 4 पयशे रकमेचेर म्हयन्याक भाड्याक म्हणल्यार वर्साक 12 रुपया 48 पयशे हे रकमेर दिल्या. ही कबलात 99 वर्सां खातीर आसा. आदींच जमीन विकिल्ल्यान हें कबलात पत्र बनावट आसा. कोमुनिदादीन गांवकारांक फटयल्यात, असो आरोप कोमुनिदादीचे गांवकार गॉडफ्री डिलिमा हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
