थायलॅण्ड

भांगरभूंय | प्रतिनिधी

थायलंडाचें नांव आयकलांच आसतलें. हो दक्षीण पूर्व आशियेचो एक देश, जाका पयलीं ‘सियाम’ नांवान वळखताले. 1948 त ताचें नांव बदलून थायलंड दवरलें. अशें आसलें तरी कांय लोक (चड करून थंय रावपी चीनी लोक) थायलंडाक आयजूय सियामूच म्हणटात. हो देश बौद्ध धर्माच्या देवळां खातीर फामाद, कारण थंय 95 टक्के परस अदीक लोक बौद्ध धर्माचे अनुयायी आसात. अशें आसलें तरीय आयजूय राम आनी विष्णू ह्या देवांची पुजा जाता. थंयचो राजपरिवार स्वताक रामाचो पूत कुश हाचे वंशज मानतात.
घडये कांय जाणांक आयकून अजाप दिसतलें, थायलंडाच्या राष्ट्रीय ग्रंथाचें नांव ‘राम कियेन’ आसा, जो रामायणाचोच थाई अणकार आसात. थंयचें राष्ट्रीय चिन्न गरूड आसा आनी सगळ्यांक खबर आसतलेंच गरूड हें विष्णू देवाचें वाहन मानतात.
तशें पळोवपाक गेल्यार पुराय संवसारांतले लोक कसल्या ना कसल्या अंधविस्वासाचेर विस्वास दवरतात. थायलंडांचेय लोकां मदीं भुता खेतां विशीं आगळीच परंपरा आसा. थंयचे कितलेशेच लोक भुतां खेतां पासून स्वताची राखण करचे खातीर आपल्या घरांत तांचे खातीर एक वेगळी कूड बांदतात.
ह्या देशांत शाही परिवाराचो अपमान करप म्हणल्यार गुन्यांव मानतात. जावं मागीर ती व्यक्ती देशांतली आसूं वा विदेशी. हो नेम सगळ्यांक लागू जाता. दुसऱ्या देशांतल्यान आयिल्ले पर्यटक लेगीत जर थंय राजपरिवाराचो अपमान करतात वा टिका करतात जाल्यार तांकां बंदखणीची ख्यास्त जावं येता.
संवसारभरांतल्या कितल्याश्याच देशांनी कुडीच्या एकाद्या खास आंगाक आगळें म्हत्व आसता. थायलंडांतूच अशेंच कितेशें आसा. थंयचे लोक आपल्या कपलाक कुडीचें सगळ्यांत पवित्र आंग मानतात. थंय खंयच्याय दुसऱ्या मनशाच्या कपलाक हात लावप बरें मानिनात. अशें करपा पासून लोक फाटीं रावतात.
संवसारांतलो चडसो दरेक देश कोणाचो ना कोणाचो गुलाम रावला, पूण थायलंड एक असो दक्षीण – पूर्व आशियायी देश आसा, जो केन्नाच खंयच्याच युरोपी देशा वरवीं गुलाम जावंक ना. युरोपी शक्ती आड जाल्ल्या झुजांत ताका कांय प्रदेश परतून दिवचे पडिल्ले, जे आयज म्यानमार आनी मलेशियाचे भाग आसात.
थायलंडाची राजधानी बँकॉक. ताचें नांव एका खाशेल्या कारणा खातीर गिनीज वर्ल्ड रिकॉर्डांत नोंद आसा. घडये खबर आसचें ना, पूण ह्या शाराचें नांव संवसारांत सगळ्यांत लांब नांव आसा. बँकॉक हें ताचें इंग्लीश नांव. खरें पुराय नांव संस्कृत आनी पाली भास मेळून जालां. हें नांव इतलें लांब आसा, जे तुमी घडये सारकें म्हणपाक पसून शकचे नात. बँकॉकाचें पुराय खरें नांव आसा ‘क्रुंग देवमहानगर अमररत्नकोसिन्द्र महिन्द्रायुध्या महातिलकभव नवरत्नराजधानी पुरीरम्य उत्तमराजनिवेशन महास्थान अमरविमान अवतारस्थित्य शक्रदत्तिय विष्णुकर्मप्रसिद्धि’.