भांगरभूंय | प्रतिनिधी
म्हयन्याक सरासरी 8 बायलांक मरण
भांगरभूंय । पिनाक कल्लोळी
पणजीः गोंयांत 2014 ते 2023 ह्या 10 वर्सांच्या काळांत म्हयन्याक सरासरी 8 बायलांक कांक्राच्या दुयेंसाक लागून मरण आयलां. म्हयन्याक सरासरी 3 बायलांक गर्भाशयाच्या कांक्राक लागून केंद्रीय भलायकी राज्यमंत्री प्रतापराव जाधव हांणी लोकसभेंत लेखी जापेंतल्यान ही म्हायती दिल्या.
आमदार शफी परांबील हांणी हे विसीं अतारांकीत प्रस्न उपस्थीत केल्लो. जापेंतल्यान मेळिल्ले म्हायती प्रमाण भारतीय वैजकी संशोधन परिशद राष्ट्रीय कांक्र नोंदणी प्रकल्प चलयता. ते प्रमाण 2014 ते 2023 ह्या काळांत देशभरांत कांक्राक लागून मरण आयिल्ल्याची आकडेवारी काडल्या. ह्या 10 वर्सांत गोंयांत 1,002 बायलांक थानाच्या कांक्राक लागून मरण आयिल्लें. तातूंत 2023 त सगळ्यांत चड 110 बायलांक थानाच्या कांक्राक लागून मरण आयलें. 2022 त 109, 2021 त 106 आनी 2020 त 103 बायलांक कांक्राच्या दुयेंसाक लागून मरण आयलें.
ह्या 10 वर्सांच्या काळांत पुराय देशांत 7 लाख 36 हजार 579 बायलांक थानाच्या कांक्राक लागून मरण आयलें.
तेचप्रमाण 2014 ते 2023 ह्या काळांत गोंयांत 441 बायलांक गर्भाशयाच्या मुखाच्या कांक्राक लागून मरण आयलें. 2023 त सगळ्यांत चड 48 बायलांक गर्भाशयाच्या मुखाच्या कांक्राक लागून मरण आयलें. 2021 आनी 2022 त 47, 2020 त 46, 2019 त 44, 2018 आनी 2017 त दरेकी 43, 2016 त 42, 2015 त 41 आनी 2014 त 40 बायलांक गर्भाशयाच्या मुखाच्या कांक्राक लागून मरण आयलें. ह्या 10 वर्सांत पुराय देशांत 3 लाख 51 हजार 432 बायलांक गर्भाशयाच्या मुखाच्या कांक्राक लागून मरण आयलें.
जापेंत म्हणलां, केंद्र सरकारा वतीन राष्ट्रीय भलायकी मोहिमे खाला सगळ्या राज्यांक अर्थीक आनी तंत्रीक मजत करतात. हे विशीं राज्यांनी केंद्राक प्रस्ताव धाडप गरजेचें आसता. हे मोहिमे खाला भलायकी मळा वयल्यो मुळाव्या सुविधांची उदरगत करप, कांक्र जावचो न्हय हे खातीर जनजागृती करप, पूर्व निदान करप, ब्रेस्ट स्क्रिनींग करप अशे विवीध उपाय करतात. गर्भाशयाच्या मुखाचो कांक्र टाळचे खातीर 9 ते 14 वर्स् पिराय गटांतल्या चलयांक वासीन दिवपाचो लेगीत केंद्र सरकाराचो विचार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
