भांगरभूंय | प्रतिनिधी
-विश्वजीत राणेः भलायकी खात्याची खाजगी कंपनी कडेन समजिकाय कबलात
पणजी: भलायकी खात्या वतीन राज्यांतल्या थानांचो कांक्र आशिल्ल्या दुयेंतींक व्हड थाकाय मेळटली. भलायकी खात्या वतीन ह्या दुयेंसाच्या उपचारांत आतां ‘पर्टूझूमॅब’ हे अत्याधुनीक वखद वापरतले. ‘पर्टूझूमॅब’ हे वखद दुयेंतींक मुफत दितले, अशी घोशणा भलायकी मंत्री विश्वजीत राणे हांणी मंगळारा पत्रकार परिशदेंत केली. ह्या वेळार गोंय वैजकी म्हाविद्यालय आनी हॉस्पिटलाचे डीन डॉ. शिवानंद बांदेकार आनी हेर अधिकारी हाजीर आशिल्ले.
फाटल्या कांय वर्सांत राज्यांत थानांच्या क्रांक्र दुयेंतीची संख्या वाडत आसा. थानांच्या कांक्र दुयेंतीचीं वर्साक सादारण 250 ते 300 दुयेंती मेळटात. हे खातीरुच आमी ‘पर्टूझूमॅब’ची निवड केल्या. हे खातीर भलायकी खात्यान एका खाजगी कंपनी वांगडा समजिकाय कबलात केल्या. हे विशींचे काम डॉ. अनुपमा बोरकार आनी डॉ. बांदेकार हांचे देखरेखी खाला करतले.
भलायकी खात्या वतीन सामान्य लोकांक फायदो जावचो हे खातीर आमी यत्न करतात. ते खातीरूच राज्यांतल्या 48 हिमोफिलिया दुयेंतींचेर मुफत उपचार करपाचो निर्णय लेगीत आमी घेतला. अशी येवजण राबोवपी गोंय हे देशांतले पयलें राज्य थारलां. तशेंच स्पायनल मस्क्यूलर अट्रोफी (एसएमए) हृे स्नायूंच्या संबंदींत दुयेंस आसपी 4 दुयेंतींचेर लेगीत मुफत उपचार करतले. हाचो खर्च सुमार दोन कोटी रुपया आशिल्ल्याचे भलायकी मंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
