भांगरभूंय | प्रतिनिधी
भारतांत थानांच्या कॅन्सराच्या दुयेंतींची संख्या वाडत आसा. शारांतल्या बायलां मदीं हें प्रमाण चड आसा. थानांच्या डक्टांत ल्हान कॅल्शिफिकेशन एकठांय जाल्यार वा थानांच्या टिश्यूंत ल्हान गांठ जाल्यार थानांचो कॅन्सर जाता. थानांक गांठ येवप, ते सुजप, थानांचे कातींत बदल जावप ही थानांच्या कॅन्सराची लक्षणां.
पिराये प्रमाण, कुटुंबीक इतिहास, मासिक पाळीचो त्रास, शारिरीक हालचाल करप ना, भुरगीं ना जावप, मोटसाण हाका लागून थानांच्या कॅन्सराचो धोको चड वाडटा. बायलांक वयल्या परिस्थिती पसून पयस रावपाचें आसल्यार आहारांतल्यान कांय गजाली काडून उडोवप गरजेचें. अशें केल्यार कांय प्रमाणांत धोको उणो जावंक शकता.
सतत ड्रिंक केल्यारुय थानांच्या कॅन्सराचो धोको वाडटा. सोऱ्याच्या सेवनाक लागून एस्ट्रोजनाची पातळी वाडटा आनी डीएनए पेशींचें लुकसाण करता. एका संशोधना प्रमाण, ब्रेस्ट ट्यूमरच्या उदरगतींत साकर व्हड प्रमाणात मजत करता. सॉस, स्पोर्ट्स ड्रिंक, चॉकलेट मिल्क सारकिल्ल्या पेयांनी साकर चड प्रमाणांत आसता. देखून शक्य तितले हीं खाणां खावप टाळचें.
ब्रेस्ट कॅन्सर वाडपाचे आनीक एक कारण म्हळ्यार प्रोसेस्ड फूड. बर्गर, फ्रेंच फ्राय, चाट सारकिल्ल्या पदार्थांक लागून थानांच्या कॅन्सराचो धोको वाडटा. चरबी, मीठ आनी प्रिझर्वेटिव्हयुक्त मटणाक लागून थानांच्या कॅन्सराचो धोको वाडटा. रेड मीट (बीफ, पोर्क) खूब खावपी बायलांक हें दुयेंस जावपाचो धोको खूब पटींनी वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
