भांगरभूंय | प्रतिनिधी
70 जाणांक लागण : ‘स्वस्थ महिला स्वस्थ गोंय’ उपक्रम
भांगरभूंय । प्रतिनिधी
पणजी : भलायकी खात्या वतीन ‘स्वस्थ महिला स्वस्थ गोंय’ हो उपक्रम चालीक लायला. हाचे खाला गोंयांतल्या 1 लाख 63 हजारां परस अदीक बायलांक थानांच्या कांक्रा खातीर तपासणी केली. ह्यो तपासण्यो दुखविरयत आयईबी उपकरणा वरवीं केल्ल्यात. तातूंत 3300 परस अदीक बायलां कांक्रा संबंदांत दुबावीत सांपडल्यो, जाल्यार 70 जाणांक कांक्राची लागण जाल्या.
मुळाव्या तशेंच कम्युनिटी भलायकी केंद्रांत थानांच्या कांक्रा खातीर फुकट तपासणी करतात. ताका लागून कांक्राचीं लक्षणां बेगीन वळखून उपचार सुरू करप शक्य जालां. मुळाव्या पांवड्यार उपचार सुरू जाल्यार दुयेंतीचो जीव वाटावपाक सोंपें जाता. आयईबी उपकरण हें दुखविरयत आनी रिडिएशन मुक्त आसा. ताका लागून तपासणीचे अहवाल बेगीन मेळटात. हे वरवीं तपासणी करप सगळ्यां खातीर सोंपें आसता.
‘स्वस्थ महिला स्वस्थ गोंय’ हो उपक्रम ऑक्टोबर 2021 त सुरू जाल्लो.
उपक्रमा खाला सुरवेक दोन वर्सांच्या कालांत 1 लाख बायलांची तपासणी करपाची आसली. ते उपरांत ह्या उपक्रमाचो कालावधी वाडयल्लो. हातूंत थानांच्या कांक्राचे तपासणी सयत, हे विशीं जागृती करप, शिक्षीत करप हांचोय आस्पाव आसा. सध्या ह्या उपक्रमांतल्यान गोंयांतल्या वट्ट 2.5 लाख बायलांची तपासणी करपाची मोख आसा. खात्या वतीन पोरूं सावन थानांच्या कांक्रा खातीर आशिल्ली म्हारग वखदां लेगीत फुकट दितात.
मेळिल्ले म्हायती प्रमाण गोंयांत 2020 ते 2024 ह्या काळांत जीएमसींत सांपडिल्ल्या हेर कांक्राच्या दुयेंतींचे तुळेंत थानांचो कांक्र आशिल्ल्या दुयेंतींचें प्रमाण सगळ्यांत चड आशिल्लें. वयल्या काळांत वट्ट 5816 कांक्राचे दुयेंती आशिल्ले. तातूंतले 1483 (25.50 टक्के) हे थानांच्या कांक्राचे आशिल्ले. हाचोच अर्थ वयल्या काळांत जीएमसींत म्हयन्याक थानांच्या कांक्राचे सरासरी 24 दुयेंती सांपडिल्ले. गोंयांत 2014 ते 2023 ह्या 10 वर्सांच्या काळांत म्हयन्याक सरासरी 8 बायलांक थानांच्या कांक्राक लागून मरण आयलां. वयल्या काळांत गोंयांत 1002 बायलांक थानांच्या कांक्राक लागून मरण आयलां. जाल्यार 2022 त 109, 2021 त 106 आनी 2020 त 103 बायलांक थानांच्या कांक्राक लागून मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
