भांगरभूंय | प्रतिनिधी
सां जुझे दी अरियाल ग्रामसभेंत मागणी
भांगरभूंय । प्रतिनिधी
मडगांव : छत्रपती शिवरायांचो पुतळो उबारपाच्या प्रकरणांत मायणा कुडटरी पुलिसांनी थळाव्या लोकांचेर दाखल केल्ले गुन्यांव फाटीं घेवचे. आदिवासी भावांची ह्या प्रकरणांत सतवणूक करची न्हय. अश्या आशयाचे तकटे आनी हातांत काळे कपडे घेवन सां जुझे दी अरियल ग्रामसभेंत लोकांनी तत्काळ गुन्यांव फाटीं घेवपाची मागणी केली.
पोरूं सां जुझे दी अरियाल वाठारांत छत्रपती शिवाजी महाराजांचो पुतळो उबारताले. त्या वेळार लोकांनी रस्तो नासतना दुसऱ्यांचे मालमत्तेंतल्यान वचपाक विरोध केलो. हो सगलो प्रकार फकत जमनी हडप करचे खातीर रस्तो करपाचो प्रकार आशिल्ल्याचो दावो करून आंदोलन केल्लें. ह्या प्रकरणांत सां जुझे दी अरियालांतल्या खूबश्या थळाव्या लोकांचेर मायणा कुडटरी पुलिसांनी गुन्यांव दाखल केल्ले. सां जुझे दी अरियालांतल्या आनी अश्या 27 जाणांचेर पुलिसांनी न्यायालायंत आरोपपत्र दाखल केलां. हाचे पडसाद सां जुझे दी अरियालच्या आयतारा घेतिल्ले ग्रामसभेंत दिसले. हे ग्रामसभेंत आमदार क्रूझ सिल्वा लेगीत हाजीर आशिल्ले.
ग्रामसभेंत शिवरायांचो पुतळो उबारपाक थळाव्या लोकांनी विरोध करूंक नासिल्लो, जाल्यार ती पद्दत बेकायदेशीर आशिल्ली ताका विरोध केल्लो. ते सुवातेर वचपाक वाट नासतनाय थंय रस्तो करताले. तरी लेगीत पुलिसांनी थळाव्या लोकांचेर गुन्यांव नोंद केल्यात. हो थळाव्या आदिवासी समाजांतल्या भावांची सतवणूक करपाचो यत्न आसा. सरकारानूय खूब खेपे गुन्यांव फाटीं घेतले अशें सांगिल्लें, मात तशें कांयच जावंक ना, अशें पिटर व्हिएगश हांणी सांगलें.
जमनी राखपा खातीर थळाव्या लोकांनी आंदोलन केल्लें. तातूंत वैयक्तीक सुवार्थ नाशिल्लो, तरी लेगीत चुकीचे पद्दतीन गुन्यांव नोंद केल्यात. आतां पंचायतीन आनी आमदारान विवीध पांवड्यांचेर यत्न करून हे गुन्यांव फाटीं घेवपाक लावचे, अशी मागणी फ्रेडी ट्राव्हासो हांणी केली.
ते उपरांत हाजीर आशिल्ल्या लोकांनी काळे कपडे आनी सरकार विरोधी तकटे हातांत घेवन निशेध केलो, तशेंच गुन्यांव फाटीं घेवपाची मागणी केली. आमदार क्रूझ सिल्वा हांणी सांगलें, थळाव्या लोकां वयले गुन्यांव फाटी घेवपाची मागणी जिल्होधिकारी, पुलीस अधिक्षक आनी हेर पांवड्याचेर केल्ली. सध्या ह्या प्रकरणांत न्यायालयांत सुनावणी चालू आशिल्ल्यान चड उलोवपाक मेळना. मात न्यायालयीन लडाये खातीर पुराय तेंको आसतलो, अशेंय तांणी सांगलें.
गांवांत व्हड प्रकल्पांक विरोध
सां जुझे दी अरियाल ग्रामसभेंत गांवांत व्हड प्रकल्पांक पंचायतीन परवानगी दिवची न्हय, अशी मागणी केली. गांवांतल्या संसाधनांचो विचार केल्यार आनीक लोकसंख्या गांवांत खूबशे प्रस्न निर्माण करपाक शकता. ताका लागून गांवाची आस्पावन घेवपाची तांक समजून घेवचे खातीर समिती स्थापन करून सर्वे करपाचें थारायलें. ते भायर गांवाचो योग्य आराखडो तयार करून संसाधनां सयत हेर गजालींचो आराखडो तयार करचे खातीर जिओ वा ड्रोन मॅपींग करचें, अशीय मागणी लोकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
