भांगरभूंय | प्रतिनिधी
फ्रान्सीस सार्दीनः सां जुझे दी आरियाल गांवच्या लोकांक विस्वासांत घेवप गरजेचें आशिल्लें
भांगरभूंय | प्रतिनिधी
मडगांवः सां जुझे दी आरियाल वाठारांत छत्रपती शिवाजी महाराजांचे जयंती दिसा तांचो व्हडलो पुतळो उबारलो. शिवरायांचो पुतळो बसयतना थळाव्या लोकांक विस्वासांत घेवपाची आनी योग्य ते कायदेशीर परवाने घेवपाची गरज आसली. मात तशें कांयच जावंक ना. जें जालें तें चुकीचें आसलें. आतां राज्य सरकारान हो विशय सोडोवचो आनी थळाव्या लोकांचेर घाल्ले गुन्यांव फाटीं घेवचे, अशी मागणी दक्षीण गोंयचे खासदार फ्रान्सीस सार्दीन हांणी केल्या. दक्षीण गोंय जिल्हो कॉंग्रेस कार्यालयांत पत्रकार परिशदेंत ते उलयताले.
कोणूय आसूं तांणी कायदो हातांत घेवप चुकीचें. मंत्री सुभाष फळदेसाय हांणी ते सुवातेर वचून पुतळ्याक अभिवादन केलें. तांणी हो पुतळो उबारपा खातीर गरजेचे परवाने घेतल्यात, असो प्रस्न उपस्थीत करून हे विशीं चवकशी करपाची गरज आसा अशें सार्दीन हांणी म्हणलें.
खंयच्याय गांवांत जर कितेंय करतात, जाल्यार गांवच्या लोकांक विस्वासांत घेवप गरजेचें. छत्रपती शिवरायांक सगळेच मानतात अशें ना. मात, तांकांय तांचें म्हान कार्य पटोवन दिवपाची गरज आशिल्ली. शिवरायांचो पुतळो बसयतना हो तांकां दिल्लो मान अशें मंत्र्यांन सांगपाची गरज आशिल्ली. जें जावपाक जायनाशिल्लें तें सगळे जावन गेलें. गुंडें शेवटिले, कोणाक तरी मार बसलो, तो आतां हॉस्पिटलांत आसा, थळाव्या लोकांचेर गुन्यांव नोंद केले. आतां जें जालें तें जालें. राज्य सरकारान आतां थळाव्या लोकांक समजावन तांचे आड घाल्ले गुन्यांव फाटीं घेवचे. हो विशय आनीक घेवन बसचो न्हय, अशी मागणी सार्दीन हांणी केली.
स्पीड ब्रेकरांची गरज
गोंयांत अपघातांचें प्रमाण वाडत चल्लां. खूबश्या रस्त्यांची परिस्थिती अजून लेगीत सामकी वायट आसा. गाडयोय वेगान वतात. अपघात जावपी वाठारांनी स्पीड ब्रेकर आनी सुचवण्यो दिवपी तकटे लावपाची गरज आसा. गोंयांत कांय रस्त्यांची बारीक सारीक कामां आसात तीं करचीं. हे रस्ते सारके करपाक मानवी हक्क आयोगाक हस्तक्षेप करचो पडटा. ही सामकी वायट गजाल. तशेंच घुवळें वखदां दवरप्यां आड कारवाय करून राज्यांतलो कायदो आनी सुवेवस्था कायम राखपा खातीर यत्न जावचे अशेंय सार्दीन हांणी सांगलें.
रेंव उसपप कायदेशीर करपाची मागणी
गोंयांत खूब कडेन रेंव मेळटा. मात सध्या रेंवेचें मोल वाडलां. सामान्यांक परवडपा सारकें रेंवचें दर जावपाक रेंव उसपप कायदेशीर करचें. तशेंच मुरगांव बंदराक कोळशाचें हब करिनासतना तें तिगोवपाची गरज आसा. ताचे खातीर गरजेचे यत्न जावचे. गोंयांतलें कृषी उत्पादन आनी कृषी वाठार वाडोवपा खातीर शेतकारांक गरज आशिल्ली मजत सरकारान करची. संजिवनी साकर कारखानो सुरु करचो. इथेनॉल प्रकल्पाची गोंयाक गरज ना, अशें फ्रान्सीस सार्दीन हांणी सांगलें.
फाटले परस चड मतांनी वेंचून येतलों: सार्दीन
खासदार म्हणून काम करतना आपणें सगळो निधी लोकांच्या कामां खातीर खर्च केला. पंचायतींक, लोकांक गरजेचीं कामां करपा खातीर प्रस्ताव दिवपाची मागणी केल्ली. ते प्रमाण लोक आपले कडेन आयले, तांचीं कामां केली. फातोड्डें मतदारसंघांत फाटले खेपे भाजपा परस चड मतां मेळिल्लीं. जें कोण आतां उलयतात तांणी कसलीच मजत करूंक ना. लोकांनी म्हाका सांगात दिला. काँग्रेसींतले आमदार भाजपांत गेले तरी ताचो फरक काँग्रेसीक पडचो ना. मतदार आमचे वांगडा आसात. हे खेपे आपल्याक उमेदवारी दिल्यार दक्षीण गोंयच्यान लोकसभा वेंचणूक फाटले परस चड मतां घेवन वेंचून येतलों, असो विस्वास खासदार सार्दीन हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
