भांगरभूंय | प्रतिनिधी
मुख्यमंत्री डॉ. प्रमोद सावंत हांची बिल्डराक शिटकावणी
पणजीः गोंयकारांचीं घरां मोडून उडयतलों ही बिल्डराची धमकी सोंसून घेवचे नात. अशे तरेची धमकी जर आयली आसत जाल्यार लोकांनी कागाळ करची हे विशींची आमी दखल घेतले अशी शिटकावणी मुख्यमंत्र्यांनी दिवन बिल्डरान आडायिल्लो नेवरेंचो परंपरीक रस्तो अधिसुचीत करपाचें आस्वासन दिलें.
नेवरा ओ पिकेन एका मेगा प्रक्लपा खातीर सांत आंद्रेंचे आमदार विरेश बोरकार आनी नगर नियोजन मंत्री विश्वजीत राणे हांचें मदी पेटलें.
ह्या प्रकल्पाक तंत्रीक दाखलो दितना अधिकाऱ्यान ऑफिसांत बसून ह्या प्रकल्पाच्या फायलीचेर सय केल्या. ह्या वाठारांत दोन परंपरीक बांयो आसात आनी देवळा कडेन वचपी परंपरीक रस्तो आसा. ह्या बिल्डरान दुरगाचें काम करतना दुरीग बांयक तेंकून वता. तशेंच रस्तोय आडायला. पूण टीसीपीच्या अधिकाऱ्यांनी ह्या पळोवणी अहवालांत हें स्पश्ट करूंक ना असो आरोप बोरकार हांणी केलो.
हे सुवातेर 40 वर्सा पोरणो रस्तो आसा. हो रस्तो देवभाट वाड्याक गांवां कडेन जोडटा आनी लोक हाचो वापर करतात. पूण प्रादेशीक आराखड्यांत हो रस्तो दाखोवंक ना. आतां बिल्डर हो रस्तो आपल्या खाजगी भाटांतल्यान वता म्हूण तो रस्तो बेकायदो अशें सांगून थळव्यांक धमकी दिता अशें आसून लेगीत टीसीपीचे अधिकारी ह्या प्रकल्पाक कशी परवानगी दिता असो प्रस्न करून हो रस्तो अधिसुचीत करचो आनी हाका जापसालदार आशिल्ल्या अधिकाऱ्याचेर कारवाय करची अशी मागणी केली.
हे विशीं जाप दितना मंत्री विश्वजीत राणे हांणी सांगलें की प्रादेशीक आराखड्यांत ही सुवात सेटलमेंट म्हूण दाखयल्या आनी खात्यान ताका दुरीग बांदपा खातीर परवानगी दिल्या.
हो दुरीग बांदता आसतना बिल्डरान बांय दुरगा भायर सोडल्या. ह्या रस्त्याचो वापर थळावे लोक शेतांत वचपा खातीर करतात. पूण प्रादेशीक आराखड्याचेर फक्त 10 मिटर लांबायेचो रस्तो दाखयता. बोरकार हांणी उप्रासायिल्ल्या विशयाची दखल घेवन हो रस्तो अधिसुचीत करतले अशें आस्वासन मुख्यमंत्र्यांनी दिलें.
पूण बोरकार हे जापेन समाधानी जावंक नासले. हो बिल्डर अजूनय थळाव्यांक त्रास करता. तांचीं घरां मोडून उडयतलों अशी धमकी दिवन तांकां पुलीस स्टेशनार व्हेल्यात. ह्या बिल्डरा आड थळव्यांनी कागाळी लेगीत दाखल केल्यात अशे बोरकार हांणी सांगलें.
कोणूय बिल्डर थळाव्यांचीं घरां मोडटा अशी धमकी दिता आसत जाल्यार तांणी कागाळ दाखल करची आनी घरां कोण मोडटा तें हांव पळयतां अशें आस्वासन मुख्यमंत्री डॉ. प्रमोद सावंत हांणी दिलें. सरकार हांगा घरा वाटावपा खातीर आसा. एकल्याचेंय घर मोडपाक आमी दिवचे नात. घरां कोण मोडटा म्हणटा आसत जाल्यार ताचे आड कागाळ दिवची ताका हांव पळोवन घेतां. भौशीक बांदकाम खातें टीसीपीक हो रस्तो अधिसुचीत करपा खातीर पत्र बरयतलें. थळव्यांक अधिसुचीत केल्लो रस्तो तशेंच बांय ही दुर्गा भायर मेळटली अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
