भांगरभूंय | प्रतिनिधी
36 वो दिक्षांत सुवाळ्यांत राज्यपालांचें म्हणणें
येसाचो फाटलाव करतना नैतिकता सोडूं नाकात
आपल्या इतिहासाचो अभिमान बाळगुपाचो उलो
भांगरभूंय । प्रतिनिधी
पणजी : थळावी अस्मिताय, भास, संस्कृतीक आमचे उदरगतींतली आडखळ समजुची न्हय. ह्यो गजाली तुमचें सामर्थ, समतोलपणा आनी दिश्टीकोनाचो स्रोत आसा, अशें गोंयचे राज्यपाल तशेंच गोंय विद्यापिठाचें कुलपती पुसापती गजपती अशोक राजू हांणी सांगलें.
शेनवारा विद्यापिटाच्या 36 व्या दिक्षांत सुवाळ्यांत राज्यपाल उलयताले. ह्या वेळार कुलगुरू हरिलाल मेनन, केंद्रीय विज्ञान आनी तंत्रज्ञान खात्याचे सचीव अभय करंदीकर आनी हेर अधिकारी हाजीर आशिल्ले.
राजयपालांनी सांगलें, विद्यार्थ्यांनी आपल्या मुळां कडेन जोडिल्ले रावचे. जे व्यक्तीक आपलें मूळ खबर आसता ती व्यक्ती आपल्या मार्गा वयल्यान शेणपाची शक्यताय उणी आसता. आयज आमी मनोहरसाय सरदेसाय हांचो उगडास दवरपाक जाय. तांणी थळावें साहित्य, संस्कृती ही उण्या दर्जाची आसता, हें मान्य करूंक ना जाल्यार उरफाटे ह्यो परंपरा देश, संवसारीक पांवड्याचेर नोंद करपाक जाय, अशें तांचें मत आशिल्लें. उत्कृश्ट जावपा खातीर तुमी कोण आसात, हें पुसून उडोवपाची गरज आसना, जाल्यार तातूंत सुदारणा करपाची गरज आसता, हें तांणी जिवितांत समजून घेवपाक जाय.
आमी कोण आसात हाचे पसून आमी खंय खंयच्यान आयल्यात, हें वेगळें करपाक जावचें ना. आपल्या इतिहासाचो अभिमान बाळगुचो. इतिहास तुमच्या म्हत्वाकांक्षांक दिशा दितलो. गोंय विद्यापिठांतल्यान पदवी घेतिल्ल्या विद्यार्थ्यांनी आपले वांगडा हांगाचो दृढ तरी लेगीत मुक्त दर्या, वाड सदांच मुळा कडेन जुडिल्ली आसता हें सांगपी हांगाची तांबडी माती आनी मोडानासतना वळपी भाटांतल्या माडांची शिस्त आपले वांगडा घेवन वच्चें. येसाचो फाटराव करतना नैतिकता सोडूं नाकात, असो उलो राज्यपाल पुसापती गजपती अशोक राजू हांणी मारलो.
कुलगुरू मेनन हांणी फाटल्या कांय वर्सांत गोंय विद्यापिठान मेळयल्ल्या येसाची म्हायती दिली. एनईपी 2020 ची अंमलबजावणी करपी गोंय विद्यापीठ पयल्या थारावीक विद्यापिठांतलें एक आशिल्ल्याचें तांणी सांगलें.
शिक्षण हें फक्त गूण, पदवी हांचे खातीर ना जाल्यार सारासार विचार, बदलांक फुडो करचे खातीर आसा, अशें अभय करंदीकर हांणी सांगलें. विद्यार्थ्यांनी आपल्या शिक्षणाचो वापर संशोधन करपाक, समाजांतल्यो समस्या सोडोवचे खातीर करचो, असो उलो तांणी मारलो.
‘शिक्षण ही जिवीतभराची प्रक्रिया’
दिक्षांत सुवाळो हो विद्यार्थ्यांच्या शिक्षणाचो शेवट न्हय. ही जिवीतभरा खातीर शिकपाचे प्रक्रियेची सुरवात आसा. ज्ञान हें छाप घालपाक शकता, पूण चारित्र सासणाचें उगडास दवरता, अशें राज्यपाल पुसापती गजपती अशोक राजू हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
