भांगरभूंय | प्रतिनिधी
डुलो पाडो गोंदुल्या गाड्याक, काटूलो कोंडो आंतूच्या आड्याक, लाद्रूच्या शेतांत पेद्रूची गाय ही लोकशाय…. मनोहरराय सरदेसाय हांची ही कविता केबल नॅटवर्क प्रकरणाक ज्युस्त लागता. खांबे वीज खात्याचे, ताचेर केबल इंटरनॅट सेवा दिवप्याची, पयशे फारीक करून सेवा घेता सामान्य नागरीक. शेत एकल्याचें, गाय चरोवपाक घालता दुसरो, तिका धांवडावन उपाशी दवरल्यार लुकसाण दूद विकत घेवप्याक. घडये हीच नवी लोकशाय आसतली. सरकारी खांब्यांक केबल हुमकळावन केबलवाले लोकांक, कंपनींक सेवा दिताले. बदल्यांत भाडें घेताले, पूण तातूंतलो सरकाराचो वांटो बुडयताले. कांय कंपनींची थकबाकी तर कोटींचेर पाविल्ली. ती तांणी फारीक केल्या आसतली, पूण कांय जाणांनी ‘आयज दितां, फाल्यां दितां’ करून पयशे आडावन दवरिल्ले. ते भरपाची ऑर्द वीज खात्यान दिल्ली. ताचे आड केबलकार न्यायालयांत गेले. पूण कोर्टान पयशे भरपाक सांगलें. उपरांत वीज खात्यान धडाधड खांब्याक लोंबपी केबल कापपाक सुरवात केली. इंटरनॅट, टिव्ही सेवा ठप्प जाली. ती सामकी गरजेची म्हणटकच व्हडलो बोवाळ जालो आनी सरकारान वीज अधिकाऱ्याकूच कुशीक काडलो. हाचो अर्थ केबलवाले सरकारी यंत्रणेचेर वरचढ थारले. दोगांयनी एकमेकांचें नाक दाबतकच तोंड उक्तें जावंक ना मूं?
आतां तांकां स म्हयन्यांची मुजत दिल्या. केबल बांदपाक वीज खात्याचे खांबे वापरपाचे परवाने दितले. गतीशक्ती संचार वॅबसायटीचेर हो अर्ज भरपाचो. फुडाराक समन्वय सादपाक दोन खाशेले अधिकारी नेमल्यात. वीज लायनमॅनाक कसलोच त्रास जावचो ना, खांबो बुरसो दिसचो ना, वापरांत नाशिल्ल्यो वायरी आनी हेर वस्तू काडप अश्या अटींचेर केबल बांदपाक मेळटलें. जमनी पोंदच्यानूय केबल घालपाक मेळटले. पूण, ही शक्यताय तशी उणीच. कारण, जमनी पोंदच्या केबलांनी खंय इबाड जाला, हें तपासपाक आधुनीक उपकरणां जाय. मागीर थंय खणून वा डक्ट आसा थंयच्यान ती केबल भायर काडून दुरुस्त करपाक जाय. बरें रस्तो खणटलो कोण आनी उपरांत तो आशिल्लो तसो करतलो कोण? म्हणटकच केबल धरिल्ले खांबे सोडपाचे नात, अशेंच दिसता.
केबलवाल्यांनी इतलीं वर्सां भाडें कित्याक भरूंक ना, हाचो सोद कोणे तरी घेवंक जाय. लायटीचें बील दोन म्हयने भरूंक ना जाल्यार कनेक्शन काडटात. मात ह्या केबलांक कोणें हात लावंक नात. तांणी खरेंच भाडें भरूंक ना काय दिवचले तालांव बोल्सांत उडयिल्लो तसलो बी प्रकार जाला? भाडें वसूल करपाचें काम खंयचो अधिकारी करतालो, ताणें तें कित्याक करूंक ना, ताचीय चवकशी जावची. फक्त वीज खात्याचेच न्हय, तर टेलिफोनाचें खांबे, घरां, झाडां, दुरगां सगल्यांकूच हे केबल बांदिल्ले आसात. ते इतले आसात की आपलो खंयचो हें पसून केबलवाल्यांक वळखूंक येना. समाजसेवा म्हूण मुफत केबल सेवा दिल्ली जाल्यार समजूं येतालें. हांगा ते गिरायका कडल्यान भरपूर दुडू घेतात. मागीर ते भाडें कित्याक भरिनात? कांय वर्सां फाटी केबल काडटले, असो बोवाळ जाल्लो. काडिल्लेय बी. पूण ते तोडूंक नाशिल्ले. हे खेपे ते तोडटकच इंटरनॅट सेवा बंद जाली. बँको, खाजगी आस्थापनां, शाळा, सरकारी कार्यालयां, सामान्य लोकांक मनस्ताप जालो. कारण आयज इंटरनॅट, सोशल मिडिया बगर पान हालना. देखूनच सरकाराक धडाधड पावलां उखलचीं पडलीं!
मार्चांत ह्या नॅटवर्क केबल प्रकरणाचेर सुनावणी जावपाची आसा. सरकाराची येणावळ बुडोवपी हेर वेवसायिकांक जसो दंड घालतात, तसो केबलवाल्यांक घालूंक मेळना? खांब्यांचेरूच न्हय, मेळता थंय केबल बांदपाचे प्रकार जाल्यात. झाडांय सुटूंक नात. तीं आमकां इतलें सगलें दितात, पूण आमी तांकां किंकोत करतात, हें हालींच्या दिसांनी पळोवपाक मेळ्ळां. खांब्यांचेर, झाडांचेर लायिल्ले बॅनर, जायरातींचें कितें? तांचे कडल्यान पालिका, पंचायती भाडें घेतात? हय जाल्यार मागीर केबलवाल्यां कडल्यानूय घेता आसतल्यो. तशें जाल्यार वीज खात्यानूच तांकां माफ कशे केले? काय हाचे फाटल्यान कसली ‘अंदर की बात’बी आसा?
रीण फारीक करता, ते प्रमाण केबलवाल्यांनी आतां मेरेनची थकबाकी इल्ली इल्ली करून भरुंक फावो. सरकाराचो पयसो हो निमणो लोकांचो. तो बुडोवप योग्य न्हय. फुडाराक डीश अॅण्टेना वरवीं इंटरनेट वापरपाक मेळूं येता. सध्या टाॅवरांक लागून तें मोबायल फोनाचेर मेळटा. केबल जोडपाची गरज ना. आतां डीश बसयल्यार टीव्ही चॅनल मेळटात, ती सुविधा सगल्या चॅनलांक परवडपी मोलांत मेळूं येता. जमनी पोंदच्यान केबल सेवा दिवप तशें बरे. पूण पुरवण आनी दुरुस्तीची जापसालदारकी घेवची पडटली. भोवतेक सरकारी सुविधा आॅनलायन जायत, म्हयन्याचे डेटा पॅकेजीचें मोल देंवत जाल्यार फुडाराक दरेकल्याक केबल कनेक्शन घेवचेंच पडटलें. ताचे पयलीं हुमकळपी कबलांचें कितें करचें ताचो निर्णय घेतल्यार बरो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
