भांगरभूंय | प्रतिनिधी
वास्कोः पंचायत मंडळांनी लोकां कडल्यान येणे आशिल्ली घरपट्टी आनी हेर थकबाकी वसुली केली ना जाल्यार ताका सरकारा कडल्यान अतिरिक्त निधी दिवपाचें बंद करतले अशी शिटकावणी पंचायत मंत्री माॅवीन गुदिन्हो हांणी दिली. काल (सोमारा) बोगमाळो पंचायत मंडळाचे बसकेंत ते उलयताले. पंचायतींचें काम बरे भशेन चलपाक जाय जाल्यार नेमान करचें अशें आवाहन तांणी केलें.
लोकांक सगल्यो नागरी सुविधा जाय आसतात. मात घरपट्टी आनी हेर कर भरपाक मात ते फाटीं फुडें सरतात. अशा लोकां आड कारवाय करपाक आपणें नव्यान वेंचून आयिल्ल्या पंचायत मंडळांक सांगलां. लोकांनी कर भरलो ना जाल्यार तांकां जाय आशिल्लीं प्रमाणपत्रां दिवपाचें बंद करात अशें आपणें तांकां सांगलां अशें मंत्री मॉवीन गुदिन्हो हांणी सांगलें.
थकबाकी वसुलीक पंचायत मंडळांनी प्राधान्य दिवपाक जाय. ताचे बगर तांकां सरकारी निधी दिवपाचो काय ना, हाचो विचार करपाचो वेळ आयला. सरकारी निधीचेर पंचायतींचो कारभार कितलो तेप चलतलो. अर्थीक नदरेन सक्षम जावपाक जाय जाल्यार पंचायत मंडळांनी थकबाकी वसुलीचेर लक्ष दिवंक जाय आनी लोकांनी प्रामाणीकपणान कर भरूंक जाय, अशें तांणी सांगलें.
बोगमाळो हांगा शॅक चलोवपी एकल्यान बोगमाळो पंचायत मंडळाक आपूण कर भरचो ना, खंयच्या अधिकारांत शॅकवाल्यां कडल्यान कर घेतात अशें ताणें विचारलां. पंचायती कडल्यान सगल्यो सुविधा घेवन कर भरपाक न्हयकार दिवपी ह्या शॅकवाल्याचेर खर कारवाय करपाची शिटकावणी गुदिन्हो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
