त्रिसा-गायत्री जोडी क्वॉर्टरफायनलींत

भांगरभूंय | प्रतिनिधी

त्रिसा जोली आनी गायत्री गोपिचंद हे भारताचे बायलांचे दोट्टी गटांतले जोडयेन सिंगापूर ओपन बॅडमिंटन सर्तींत संवसारीक क्रमवारींत दुसरे सुवातेर आशिल्ले दक्षीण कोरियाचे बेक हा ना आनी ली सो ही हे जोडयेक 21-9, 14-21 आनी 21-15 अशा तीन गेमींनी हारोवन क्वॉर्टरफायनलींत सुवात मेळयली.

ऑलिम्पीक खेळां सर्तींत दोन खेपे पदकां जिखपी पी व्ही सिंधूचो बाबत प्रदर्शन हे सर्तींत लेगीत कायम उरलें.

दक्षीण कोरियाचे जोडयेन मॅचींत साबार चुकी केल्यो. ताचो फायदो घेत त्रिसा आनी गायत्री हे जोडयेन पयली गेम 21-9 अशा फरकान सहज जिखली. पूण, भारताचेच जोडयेन प्रतिस्पर्धी जोडयेक मॅचींत येवपाची संद दिली. दुसरे गेमींत दक्षीण कोरियाचे जोडयेन दुसरी गेम 14-21 अशी जिखून मॅचींत 1-1 अशी बरोबरी सादली. तिसरी गेम सामकी उमळशीक वाडोवपी थारली. तिसरे गेमीचे सुरवातीक दोनूय जोडयांनी कांय जबरदस्त स्मॅश मारले.

एका वेळार दोनूय जोडयो 8-8 अशो बरोबरीचेर आशिल्ल्यो. भारताचे जोडयेन आक्रमक खेळप चालूच दवरलें आनी सेगीत स गूण मेळोवन स्कोर 16-9 असो केलो. अखेरेक 21-15 जैत जोडून फुडले फेरयेंत सुवात मेळयली.

एकोड्या गटांत मात सिंधू आनी एच एस प्रणॉय हांचें आव्हान सोंपलें. जपानाच्या केंटा निशिमोटोन 45 मिनटांनी प्रणॉयाक 13-21, 21-14 आनी 15-21 असो हारयलो. दोनूय खेळगड्यां मदीं अजून मेरेन स मॅची जाल्यात आनी केंटोन चार जैतां जोडल्यांत, प्रणॉयाक फकत दोनूच खेपे जैत जोडप शक्य जालां.

बायलांच्या एकोड्या गटांत सिंधूक स्पेनाचे कॅरोलिना मारिना कडल्यान हार घेवची पडली. सिंधून खर संघर्श केलो पूण, स्पेनाचे खेळगडये मुखार तिचें कांय शाणपण चलूंक ना आनी 21-11, 11-21, 20-22 फरकान हारून सर्तींतल्यान भायर पडली. कॅरोलिना कडल्यान सिंधू सेगीत सवे मॅचींत हारली.