भांगरभूंय | प्रतिनिधी
आगरतळांतल्या महाराज बीर बिक्रम स्टेडियमाचेर चालू आशिल्ले चार दिसांचे रणजी मॅचीचेर येजमान त्रिपुरा पंगडान गोंयाचेर दुसऱ्या दिसाचे अखेर मेरेन शेक मेळयलो. काल खेळ सोंपलो त्या वेळार त्रिपुराच्या पयल्या डावांतल्या 484 धांवड्यांक गोंयान उण्या उजवाडाक लागून खेळ थांबोवचो पडलो त्या वेळार 4 विकेटी वगडावन 53 धांवड्यो केल्ल्यो.
त्रिपुराचो फास्ट बॉलर अभिजीत सरकारान गोंयच्या पयल्या डावाक सुरींग लायतना तीन विकेटी घेतल्यो. ताणें सुयश प्रभुदेसाय, मंथन खुटकार आनी स्नेहल कवठणकार हाका बाद केले. जाल्यार प्रोफेशनल म्हणून अंदूं गोंया वतीन खेळपी राहुल त्रिपाठीक राणा दत्तान तंबूची वाट दाखयली. खेळ सोंपलो त्या वेळार के व्ही सिद्धार्थ आनी मुखेली दर्शन मिशाळ ही जोडी खेळपट्टीचेर आशिल्ली.
ते पयलीं 4 बाद 261 धांवड्यां वयल्यान खेळपाक सुरवात करपी त्रिपुरान आनीक 223 धांवड्यांची भर घाली आनी आपल्या पयल्या डावांत 484 धांवड्यो केल्यो. तांचो मुखेली वृद्धीमान साहान 154 बॉलांनी 97 धांवड्यो केल्यो. हातूंत 14 चवक्यांचो आस्पाव आशिल्लो. तशेंच ताणें दोन अर्द शेंकड्यांच्यो भागिदाऱ्यो लेगीत केल्यो. पयलीं ताणें गणेश सतीशा वांगडा पांचवे विकेटी खातीर 68 आनी उपरांत मणिशंकर मुरासिंगा वांगडा सातवे विकेटी खातीर 91 धांवड्यांची म्हत्वाची भागिदारी केली.
पयल्या दिसा एक विकेट घेवपी ऑफ स्पिनर मोहित रेडकारान काल वृद्धीमान साहा, मुरासिंग आनी बिक्रम देबनाथ हांकां बाद करून पयल्या डावांत 74 धांवड्यो दिवन 4 विकेटी मेळयल्यो. ताचे खेरीत लक्ष्य गर्ग, अर्जुन तेंडुलकर आनी बिजेश प्रभुदेसाय हांकां दरेकी दोन विकेटी फावो जाल्यो.
गोंय पयल्या डावांत अजून 431 धांवड्यांनी फाटीं आसा. ताका संघर्श टाळपा खातीर जबरदस्त संघर्श करचो करचो पडटलो.
धांवतकटोः त्रिपुरा, (पयलो डाव) 4 बाद 261 धांवड्या वयल्यान वट्ट 123.4 ओव्हरींनी सगले बाद 484 धांवड्यो ( गणेश सतीश एलबीडब्ल्यू बॉ. अर्जुन तेंडुलकर 73, वृद्धीमान साहा एलबीडब्ल्यू बॉ. मोहित रेडकार 97, रजत डे एलबीडब्ल्यू बॉ. अर्जुन तेंडुलकर 13, मणिशंकर मुरासिंग कॅ. दीपराज गांवकार बो. बॉ. मोहित रेडकार 50, बिक्रम देबनाथ कॅ. दर्शन मिशाळ बॉ. मोहित रेडकार 35, राणा दत्ता बॉल्ड वीजेश प्रभुदेसाय 6, अभिजीत सरकार नाबाद 0 धांवड्यो, अतिरिक्त 39).
गोंय (पयलो डाव) 22 ओव्हरींनी 4 बाद 53 धांवड्यो (सुयश प्रभुदेसाय बो. बॉ. अभिजीत सरकार 13, मंथन खुटकार कॅ वृद्धीमान साहा बॉ अभिजीत सरकार 10, स्नेहल कवठणकार बो. बॉ. अभिजीत सरकार 15, राहुल त्रिपाठी एलबीडब्ल्यू बॉ. राणा दत्ता 9, के व्ही सिद्धार्थ नाबाद 3, दर्शन मिशाळ नाबाद 2, अतिरिक्त 1).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
