भांगरभूंय | प्रतिनिधी
त्रिपुरा, खबरां संस्था: धलाई जिल्ह्यांतल्या गंडाचेरा भागांत बुधवारा एका तरणाट्याची कूड फ्रिजांत मेळ्ळी. ८ जुनाक आगरतळा तरणाट्याचो खून जाल्लो. उपरांत ताची कूड हाडून फ्रिजांत लिपयिल्ली.
पुलीस अधीक्षक किरण कुमार हांणी सांगलें, मरण आयिल्ल्याचें नांव सरीफुल इस्लाम (२४) अशें आसा. तो आगरतळा स्मार्ट सिटी प्रकल्पांत इलेक्ट्रिशियन म्हणून काम करतालो. सरीफुलचो खून मोगाच्या त्रिकोणांतल्यान जालो. ताचे एके २० वर्सां पिरायेचे चलये कडेन मोगाचे संबंद आशिल्ले. ते चलयेचो पयसुल्लो भाव दिवाकरूय तिचेर मोग करतालो. हालींच त्या दोगांय मदीं झगडें पेटिल्लें आनी तीं दोगांय एकामेका कडेन उलय नाशिल्लीं. हाचो फायदो घेवन दिवाकर हाणें त्या तरणाट्याक सोंपोवपाचो कट रचलो आनी ताका घरा आपोवन ताचो खून केलो.
दिवाकराच्या तिगां इश्टांनी ताका सरीफुलाचो खून करपाक मजत केल्ली. ताची कूड आगरतळा सावन गंडाचेरा हांगा हाडली. फ्रिजांत लिपोवन दवरली. ह्या प्रकरणांत पुलिसांनी सय जाणांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
