भांगरभूंय | प्रतिनिधी
कोणाचेय वाटेक वतना ताची आनी स्वताची कुवत पयलीं पळोवपाक जाय. उखल्ली जीब लायली टाळ्याक घातक थारूं येता. दोन दिसां पयलीं मालदीवाच्या (मालदीव्ज) कांय अतिशाण्या मंत्र्यांनी हें केलें आनी तें तांच्या आंगलट आयलें. तांकां मंत्रीमंडळांतल्यान निलंबीत केल्यात. कांय सरकारी अधिकाऱ्यांचेरूय कारवाय जाल्या. ह्या सगल्यांनी भारताचे प्रधानमंत्री नरेंद्र मोदी तशेंच लक्षद्वीपाच्या पर्यटनाचेर टिका केल्ली आनी ती करतना तांणी सोशल मिडियाचेर नाका जाल्लें बरयिल्लें. खंय भारत आनी खंय मालदीव. भारता परस तो सगलेच बाबतींत दुय्यम. फक्त पर्यटनाचेर जगपी ह्या देशान भारताची कळ काडपाक जायनाशिल्ली. आतां मालदिवच्या राष्ट्रपती, प्रधानमंत्र्यान सारवासारव करपाचो यत्न केला. तें त्या मंत्र्यांचें वैयक्तीक मत आशिल्लें, अशें म्हणलां. एका मंत्र्यान ट्विटर खातेंच डिलीट केलां. पूण धनुश्यांतल्यान सुटिल्लो बाण परत घेवपाक मेळना!
प्रधानमंत्री नरेंद्र मोदी लक्षद्वीपाक गेल्ले. थंय तांणी दर्यावेळेर फोटो सेशन केलें. स्नोर्कलिंग केलें. (उदकां भितर वचून नुस्तें, दर्यांतलीं वनस्पत पळोवप) उपरांत तांणी लक्षद्वीपाची तुस्त करून सगल्यांनी हांगा पर्यटनाक येवपाक जाय, अशें ट्विट केलें. नेमकें हेंच थंयच्या तीन मंत्र्यांक उस्तुरें गेलें. मालशा शरीफ, मरियम शिऊना आनी अब्दुला महजूम माजीद अशीं तांचीं नांवां. मरियम हांची टिप्पणी चड आक्षेपार्ह आसा. तिणें मोदी हांची धजा मारल्या. तांकां इस्रायलाचे गुलाम म्हणल्यात. तिचे टिके फाटल्यान पॅलेस्टायन- इस्रायल झुजाच्या वादाची फाटभूंय आसा, अशें दिसता. बाकीच्यांनी लक्षद्वीपाच्या पर्यटनाच्यो बकच्छायो केल्यात. थंयच्या हाॅटेलांनी घाण येता. आमचें पर्यटन भारता परस वयल्या थराचें आसा, अशेंय म्हणलां. हे पोस्ट व्हायरल जाले तेन्ना मालदिवाचे विदेश मंत्री मुसा जमीर, आदले राष्ट्रपती इब्राहीम मुहमंद सोलेह, आदली विदेश मंत्री दुन्या मामून हांणी त्या तीन मंत्र्यांचेर खर टिका केल्या. प्रधानमंत्री मुहंमद मुईज्ज हांणी ह्या मंत्र्यांक सध्या निलंबीत केल्यात. दोनूय देशांनी आपापल्या राजदूतांक परत आपयल्यात. आदले राष्ट्रपती मुहंमद नशीद हांणी असली टिका ही मालदिवाच्या सुरक्षेक धोको थारूं शकता, तशेंच अर्थीक नदरेन देशाक फोंडांत घालपाक शकता, अशें म्हणलां….. आनी हो फोंड पडपाक सुरवात जाल्या.
सध्या ट्विटराचेर ‘बॉयकॉट मालदीव’ हो हॅशटॅग ट्रेंड जाला. खुबश्या भारतीयांनी मालदीव भोंवडी रद्द केल्या. कांय ट्रॅव्हल कंपनींनी थंयचें बुकिंग घेवप बंद केलां. ईज माय ट्रीप हे भारतांतले सगल्यांत व्हडले ट्रॅव्हल कंपनीन मालदीव खातीर बूक केल्ल्यो विमानाच्यो सगल्यो तिकेटी रद्द केल्यात. तिकेटी, बुकींग हो आंकडो हजारांनी आसा. कारण मालदीव हें नामनेचें पर्यटन थळ. एका भारतांतल्यानूच थंय दरवर्सा दोन ते अडेज लाख पर्यटक वतात. ते वचनासतना रावले जाल्यार मालदीवाक व्हडलें लुकसाण जातलें, हातूंत दुबाव ना. दरेकल्यान 2 लाख रुपयाच मोडले जाल्यार कितले जाले, ताचो हिशोब करचो.
विशेश म्हणल्यार भारतांत कितलीय व्हडली घडणूक घडूं, सहसा तातूंत पडनाशिल्ले अभिनेते, उद्देजक, खेळगडे ह्या वादांत दिसतात. लक्षद्वीपाक भेट दियात. मालदीवाक अशें कितें भांगर लागलां. आमच्या भारतांत काय बरीं पर्यटन थळां आसात, थंय वचात, अशें तांणी ट्विट केलां. तांचे दरेकल्याचे लाखांनी फाॅलोव्हर. म्हणटकच हाचो धपको मालदीवाच्या पर्यटनाक बसतलो, अशें दिसता. विशेश म्हणल्यार भारतीय अभिनेते, उद्देजक, खेळगडे स्वताच दरवर्सा चुकनातसना मालदीवाक वतात आनी 5- 10 लाख रुपया मोडून येतात. ह्या वादाचो लक्षद्वीपाक फायदो जावं येता.
करपाक गेलो एक आनी जालें भलतेंच, अशी सध्या मालदीवच्या मंत्र्यांची गत जाल्या. मालदीव हो हिंद म्हासागरांतलो साडेपांच लाख लोकसंख्येचो देश. (जुंवो). ताचे आनी लक्षद्वीपा मदीं 754 किलोमिटर अंतर आसा. केरळ आनी तो 822 किलोमिटर पयस. लक्षद्वीप केरळा पसून 408 किलोमिटर पयस आसा. लोकसंख्या 68 हजार. वड्याचें तेल वांयंग्याचेर काडपी त्या त्रिकुटाचें ट्विट मालदीवाक माल पडलां. तांणी देशाक संकश्टांत घाला. जाहीर माफी मागली तर हें प्रकरण सोंपू येता. पूण जी कोडसाण निर्माण जाल्या, ती इतले बेगीन निवळची ना आनी ताचो मालदिवाक फटको बसतलो, इतलें मात खरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
