भांगरभूंय | प्रतिनिधी
फोंडें, प्रतिनिधी: संजीवनी साखर कारखान्या मुखारच्या राष्ट्रीय महामार्गार फाटल्या बिरेस्तारा सकाळीं ‘हिट अँड रन’ प्रकरणांत टेम्पोचो सोद घेवपाक फोंडें पुलिसांक येस आयलें. पुलिसांनी खानापुरा (कर्नाटक) टेम्पो जप्त केला. टेम्पो चालकाकूय अटक केली. अपघातांत दुचाकी चालक महंमदरिफ हुसेनबाशा मोमीन (भूमिकानगर- उसगांव) हाका जाग्यारूच मरण आयिल्लें. जाल्यार रोहित निकोलस कुजर (२०, भूमिकानगर, मूळ झारखंड) हो जखमी जाल्लो.
फाटल्या बुधवारा रातीं मोल्या इश्टाचे वाडदिसाचे पार्टेक दुचाकी घेवन गेल्लो महंमदरिफ मोमीन आनी रोहित कुजर हे चिकनाक दोगूय लिंबू आनी कांदे उणे पडिल्ल्यान ते घेवपाक उसगांवां आयिल्ले. कांदे आनी लिंबू घेवन वतना संजीवनी कारखान्या मुखारच्या रस्त्यार विरुद्ध दिकेन येवपी अनवळखी वाहनाचो धपको बसून हो अपघात जालो. उपरांत त्या वाहनान थंयच्यान पळ काडलो. फोंडें पोलिसांनी संबंदीत वाहन चालकाचो विवीध सुवातांचेर आशिल्ल्या सीसी टीव्ही कॅमेर्याचो आदार घेवन सोदलो. अखेरेक केए-५५- एफ -१७६४ क्रमांकाचो हो टेम्पो खानापूर सांपडलो.
पुलिसांनी दिल्ले म्हायती प्रमाण, तो टेम्पो तण घेवन वाळपय वतालो. उसगांवां अपघात जाले उपरांत खोतोडें- वाळपय मार्गा वयल्यान ड्रायव्हर खानापुरा गेलो. निरीक्षक विजयनाथ कवळेकार हांच्या मार्गदर्शना खाला उपनिरीक्षक वैभव जल्मी, पुलीस शिपाय आदित्य नायक, केदार जल्मी, अमेय गोसावी, शिवाजी चव्हाण आनी साईश मांद्रेंकार हांणी अपघाताक कारण थारिल्लो टेम्पो धरपाक येस मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
