त्या जवानाची कूड ५६ वर्सां उपरांत मेळ्ळी…
भांगरभूंय | प्रतिनिधी
रोहतांग, खबरां संस्था ः भारतीय हवाई दळाच्या एएन- १२ विमानाचो ७ फेब्रुवारी १९६८ दिसा अपघात जाल्लो. ह्या अपघातांत उत्तर प्रदेशांतल्या सहारनपूरचो जवान मलखान सिंग शहीद जाल्लो. पूण ताची कूड मेळूंक नाशिल्ली. पूण आतां ५६ वर्सां उपरांत हिमाचल प्रदेशांतल्या रोहतांग दर्रे हांगा ताची कूड मेळ्ळी. बॅच नंबरावेल्यान ताची वळख पटली.
७ फेब्रुवारी १९६८ वर्सा एएन-१२ विमानान चंडीगड सावन लेहाक उड्डाण केलें. पूण कांय काळा उपरांत ते बेपत्ता जाले. ह्या विमानांत १०२ लोक आशिल्ले. कोणूच जिवो उरलो ना. त्या विमानाचे अवशेश २००३ वर्सा मेळ्ळे. जायती वर्सा बर्फान भरिल्ल्या वाठारांत जवानांच्यो कुडी आनी अवशेश उरलें.
मजगतीं, डोग्रा स्काऊटांच्या फुडारपणा खाला भारतीय सैन्याचें सोद आनी बचाव कार्य चालूच आशिल्लें. हें देशांतलें सगळ्यांत व्हडले बचाव कार्य अशें म्हण्टात. आतां भारतीय सैन्याक तातूंत व्हड यश मेळ्ळां. हिमाचल प्रदेशांतल्यान चार कुडीं मेळ्ळ्यो, तातूंतली एक कुड वायुसेनेचे सैनिक मलखान सिंग हांची आशिल्ली.
जेन्ना ताची कुड गांवांत हाडली तेन्ना ‘मलखान सिंग जिन्दाबाद’ अश्यो घोशणां लोकांनी दिल्यो. ५६ वर्सां उपरांत मलखान सिंगाचो नातू गौतम हाणें तांचे कुडीचेर निमाणे संस्कार केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
