भांगरभूंय | प्रतिनिधी
फोंडें: माशेल ते सांतईस्तेव्हच्या पुलावेल्यान चलत वचपी बायलेच्या गळ्यांतलें मंगळसूत्र चोरी केल्ल्या प्रकरणांत म्हाड्डोळ पुलिसांनी अटक केल्ल्या राजेश गोपीनाथ मापारी (३७, पोंबुर्पा) हाका फोंडें पयलोवर्ग न्यायालयान दोशी थारायला. दुबाविताक ४८ दीस न्यायालयीन बंदखण आनी ५०० रुपयांचो दंड भरपाचो आदेश न्यायालयान दिला. आरोपपत्र दाखल केले उपरांत एका म्हयन्यांत न्यायालयान निकाल दिला. म्हाड्डोळ पुलीस स्टेशनाचे निरीक्षक योगेश सावंत हांच्या मार्गदर्शना खाला उपनिरीक्षक रोशन मार्टिन हांणी हे विशीं तपास केल्लो.
ता. १७ नोव्हेंबराक रस्त्यावेल्यान चलत वचपी बायलेच्या गळ्यांतलें १ लाख ४० हजार रुपयांचें मंगळसूत्र काडून व्हेल्ले. म्हाड्डोळ पुलिसांनी तपास करून ह्या प्रकरणांत राजेश मापारी हाका अटक केली. तशेंच ताणी ह्या गुन्यांवांत वापरिल्ली जीए – ०७- एजे-५०४८ क्रमांकाची स्कुटरूय जप्त केल्ली. ता. १२ डिसेंबराक दुबाविता आड आरोपपत्र न्यायालयांत दाखल केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
