त्या कोयर सेंटराक लागून विद्यार्थी-शिक्षकांक सोंसचे पडटात त्रास
भांगरभूंय | प्रतिनिधी
पेडणें: मांद्रें पंचायत वाठारांतलो कोयर उखलपाचो पंचायतीन फुडाकार घेवन पंचायत कार्यालयाच्या फाटल्यान एक कोयराचें सेंटर तयार केलां. जाल्यार ताच्याच २५ मिटर अंतराचेर मांद्रें कॉलेज ऑफ आर्ट्स इकॉनॉमिक्स हें विद्यालय आसा. ह्या विद्यालयांतले विद्यार्थी, पालक, शिक्षकांक सकाळीं तशेंच दनपरां नाकाक लेंस बांदून थंयच्यान यो-वच करचें पडटा. ह्या कोयराक लागून हांगच्या पुराय वाठारांत घाणयारो वास पातळ्ळा. हाचो त्रास विद्यार्थ्यांक वर्गांत शिकतनाय जाता. ह्या विद्यालयांत प्रवेश केले उपरांत व्हडा प्रमाणांत हांगच्या कोयराचो घाणयारो वास कॉलेजी मेरेन पाविल्ल्याचें प्रत्यक्षांत पळोवणी केले उपरांत कळटा.
बेगीन स्थलांतरीत करचें
हाचे खातीर मांद्रें ऑफ कॉलेज कॉमर्स इकॉनॉमिक्स पालक शिक्षक संघान पंचायत भलायकी खातें संबंदीत विभागाक लेखी स्वरूपांत निवेदन दिलें. तरी आयज मेरेन कसलेच तरेची कार्यवाही जावंक ना. हो वाठारात घाणयारो करून भलायकेच्यो समस्या निर्माण करपाचें काम हे सुवातेर करतात. आतां तरी ह्या गार्बेज सेंटराचें बेगोबेग स्थलांतरीत करचें, अशी मागणी मांद्रें गट कॉंग्रेसचे अध्यक्ष नारायण रेडकार हांणी हे सुवातेर वचून पळोवणी केले उपरांत केली.
जायते शिक्षक, पालक विद्यार्थ्यांनींय हे विशीं उलयतना, आमकां सदांच ह्या घाणयारो वास येवपी वाठारांतल्यान यो-वच करचें पडटा. हाचेर कोणेंय कितेंय उपाय करपाची मागणी तांणी केली.
मांद्रें पंचायत वाठारांत एके वटेन मांद्रें पंचायत इमारत, तशें विवीध कार्यालयां आसात. ताचेच फाटल्यान पंचायतीन फुडाकार घेवन गार्बेज सेंटर उबारलां. ताचे लागसारूच मांद्रें ऑफ कॉलेज हें विद्यालय आसा. ह्या वाठारांत प्रवेश करतना रस्तो कुशीकूच आशिल्ल्यान हजारांनी नागरीकहांगच्यान यो-वच करतात. तांकांय हे घाणीचो बरोच त्रास जायत आसता. मात कागाळ कोणा कडेन करतले?हाचे पयलीं विवीध कागाळी करून लेगीत सरकारान कांयच उपाय करूंक ना. कागाळी करून कांयच जायनाशिल्ल्यान मांद्रें गट कॉंग्रेस अध्यक्ष नारायण रेडकार हांणी खर शब्दांनी तिडक उक्तायली.
रेडकार हांणी हे विशीं, मांद्रें पंचायतीन फाटले सरपंच आसतना बाळा उर्फ प्रशांत नायक हांणी हो गार्बेज प्रकल्प हांगच्यान हालोवपा खातीर सरकाराक फायल तयार करून दिल्ली. उपरांत पंचायत सरपंच बदलिल्ल्यान ताची कार्यवाही खंयतर आडकून उरल्या. ती कार्यवाही आतां पंचायत मंडळांनी करून ती सुवात दुसरे कडेन निवडल्या. त्या जाग्यार हे गार्बेज सेंटर उभारचें अशी मागणी करून ह्या गार्बेजची समस्या आनी घाणयारो वास मांद्रें कॉलेजीचे विद्यार्थी, पालक, शिक्षकांक सोंसचो पडटा. मांद्रें ऑफ कॉलेजच्या विद्यालयान पालक शिक्षक संघा वरवीं पंचायतीक निवेदनूय सादर केलें. मात ताची आजूनय कार्यवाही जावंक ना. ती कार्यवाही बेगीनूच करून ह्या घाणयार्या वाठारांतल्या सगळ्यांची सुटका करची, अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
