भांगरभूंय | प्रतिनिधी
आख्ख्या गांवांत आमगेरूच तेन्ना टीवी आशिल्लो. वाड्या वेल्या पांडू मेस्ताक हाडून टीवी खातीर आमी सायल्याच्या
लांकडाचे एक बॉक्स करून घेतिल्लें. गांवांत मेजक्याच घरांनी रेडिओ वा ट्रांझिस्टर आशिल्लो.
रामायण, महाभारत ना जाल्यार क्रिकेट मॅच सुरू जातकूच, अर्दो गांव आमगेर भरतालो. थोडेच जाण यताले, तेन्ना खुर्च्यो अोडून आवंताद बसताले. हळू हळू फुकटे पळोवपी चड जाले आनी तांकां बसपाक शेंदऱ्यो घालच्यो पडटाल्यो. टीवी हाडला म्हणून गांवभर बोवाळ जालो आनी तांकां बसपा खातीर जादमां घालची पडपाक लागली.
जाण्टेलीं बायलां यतालीं, तांचे खातीर फुडले सुवातेर तांकां शेंदऱ्यो घालून दवरिल्ल्यो आसताल्यो. टीवी सुरू जावचे वेळार रामायण, महाभारत पळोवपाक ती खर्शेत, खर्शेत येतालीं. तातूंतलीं एक जाण्टेली पोवलेंत घालून, नाल्लाची केल्ली पंचखाद हाडटाली. रामायण सुरू जावचे पयलीं उजवात पेटयताली आनी टीवीक उंवाळटाली. टीवीतल्या राम-सीतेक पळोवन तांकां पांय पडटाली आनी आपल्या पोल्याक हात लायताली. चार, पांच बायलां णवांकूच येवन बसतालीं आनी धा वरां जाय मेरेन गांवांतले ढवळे करत रावतालीं. रामायण सोंपतकूच, प्रसाद हाडिल्ली जाण्टेली थोड्याच लोकांक हाडिल्लो प्रसाद वांट्टाली.
तेन्ना मुंबयच्यो कार्यावळी, गोंय दूरदर्शन केंद्र प्रक्षेपण करतालें आनी घरार ना जाल्यार टेर्रासाचेर लायिल्ल्या अॅंटिना वेल्यान कार्यावळी आमकां पळोवंक मेळटाल्यो.
एक-एकदां Transmission बरोबर नाशिल्ल्यान टीवीचेर ‘रुकावट के लिये खेद हैं’ अशें Caption येतालें आनी तेन्नाच, रावण सीतेक व्हरपाक आयला, हो सीन चालू आसतालो. प्रक्षेपण मदींच थांबतकूच सगल्यांची कुजबूज सुरु जाताली. त्या बोवाळांत, रावणाक आवय बापाय वेल्यान गाळयो पडटाल्यो. परतून कार्यावळ सुरू जाली काय ताळयो आनी शेळवण्यो मारून सगले जाण आपली खोशी परगटायताले.
टीवीक एक दुयेंस आशिल्लें. कार्यावळी रंगार आयिल्ल्यो आसताल्यो तेन्नाच तो मान उडयतालो. पूण मोगान ल्हानशें थापट मारीत जाल्यार परतून सुरू जातालो. टीवीक क थापट मारपाचें काम, प्रसाद हाडपी जाण्टेली बायल व्हड उमेदीन करताली.
एक-एकदां नेटान वारो यतालो आनी नळ्यार, कामीक बांदिल्लो अॅंटेना, आरत्याचो पोरतो जातालो. मागीर एकलो देड-शाणो नळ्यांचेर चडटालो आनी गाडयेचे स्टियरींग घुंवडायतात तसो अॅंटेना आपणाक जाय तसो घुंवडायतालो. आमी मागीर बोब मारीत सकल्यान ताका Direction दिताले. एक-एकदां सगल्यांच्यो बोबो आयकून तो बेजारतालो आनी फोलीनांतल्यो कुड्याच्यो विडयो काडून घरार फुकत बसतालो.
एकदां अॅंटेना घुवंडायतना उटंगाराचो पावस आनी वादळी वारें आयलें. थोड्याच वेळांत जोगलां मारपाक लागलीं आनी ताका शोॅक मारिल्ले भशेन जालें, आनी हुयेली आनी किंचाट्यो मारीत अॅंटेना सकट तो देडशाणो नळ्या वेल्यान घडघडत सकयल पडलो अनी रावण सीतेक फारायता, तो प्रसंग पळोवप्यांक चुकलो.
एक-एकदां, हुंदरान अॅंटेनाची वायर चाबडायिल्ली आसताली. ताका लागून पिक्चर भिलभिलतालें. टॉर्च घेवन मागीर, वायर खंय चाबडायल्या तें सोदचें पडटालें. चाबडायल्या तितलीच केबल मदींच कापून परत जोडची पडटाली आनी टीवी बेसबरो दिसपाक लागतालो.
थोड्या तेपान, बाजरांत रंगीत स्क्रीन आयली. ती टीवी मुखार लायतकुच, ब्लॅक अॅण्ड व्हायट स्क्रिनीचेर दोन, तीन कोरांनी ( रंग ) टीवी पळोवंक मेळटालो.
टीव्ही चेर रामायण, महाभारत, आयतरा दनपारचो Regional ना जाल्यार National Award मेळिल्लो सिनेमा, सांजे स वरांचेर हिंदी सिनेमा, बुधवरा छायागीत, शुक्ररा चित्रहार ह्यो कार्यावळी पळोवप्यांक मजा हाडटाल्यो, पैसा वसूल करताल्यो.
त्या वेळार क्रिकेटी मॅची बी आसतना भुरग्यांची गर्दी पडटाली. चड करून भारत-पाकिस्तान मॅच आसताली तेन्ना चडशीं भुरगीं टीवी पळोवंक येतालीं. त्या वेळार गावस्कर, कपीलदेव, किरमाणी, वेंगसरकर, अमरनाथ हांचे सारके खेळगडे भारताच्या पंगडांत खेळटाले. जाल्यार पाकिस्ताना वटेन इमरान खान, वासीम बारी, मुदस्सर नझर, सरफरज नवाज, जावेद मियांदाद, झहीर अब्बास हे पाकिस्तान पंगडांतल्यान खेळटाले. कपील देव आनी इमरान खान हे दोगूय त्या वेळा वेले अश्टताशी खेळगडे. इमरान खान त्या वेळा वेलो फस्ट बॉलर. तो धांवत येवन बॉलींग घालतालो तेन्ना आमच्या पोटांत एकूच गुळो येतालो.
तेन्ना आतां भशेन वन डे मॅची जायनाशिल्ल्यो. चडश्यो टॅस्ट मॅचीच जाताल्यो. त्यो लेगीत पांच बी अश्यो. म्हळ्यार खंयचोय पंगड दुसऱ्या देशांत गेलो जाल्यार तो सुमार देड म्हयनो तरी त्या देशांत रावतालो. वन डे मॅचींचो काळ त्या वेळार नाशिल्लो. आतां काळ बदल्ला. आतां टॅस्ट मॅची उण्यो आनी वन डे आनी टी20 मॅची चड जावपाक लागल्यात.
त्या वेळार एकूच चॅनल (DD 1) आशिल्ल्या कारणान सगल्यांक, खंयचे दिसा खंयची कार्यावळ आसा हे तोंडपाठ आसतालें, आनी ते प्रमाण दरएकलो आपअापल्या दिसाच्या कामांचो हिशोब
लायतालो.
त्या तेपार नितळ मनोरंजन आनी गिन्यान वाडोवपी कार्यावळी खातीर लोक टीवी पळयताले… पूण आतां चॅनल सासपुपा खातीर टीवी पळयतात.!!
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
