भांगरभूंय | प्रतिनिधी
चिंतन – 79
“त्यागिल्याचें ध्यान राहिलें अंतरीं ।
अवघी ते परी विटंबना ॥
तुका म्हणे आपआपणा विचारा ।
कोण हा दुसरा सांगे तुम्हां ॥”
तुकाराम महाराज म्हणटात – भायल्यान कितलेंय त्यागी दिसले आनी मनांत सतत ताचोच विचार केल्यार हो त्यागी न्हय तर त्यागाचो अपमान. आतां हें विनोदी उदाहरणांनी पळोवया.
रामू दर दिसा एका व्हडल्या दुकानांतल्यान डेअरी मिल्क घेतालो. एक दीस ताणें म्हणलें – “आयच्यान हांवें चॉकलेट खावप बंद केलां!”
सगळ्यांनी ताळयो मारल्यो. पूण दोन मिनटां उपरांत ताणें विचारलें – “आरे, आयज ऑफर आशिल्ली? दोन घेतल्यार एक फुकट अशें कितें तरी आशिल्लें?” आतां पळयात – चॉकलेट हातांतल्यान गेली, पूण ती मनांतल्यान गेली काय? अजिबात ना!
सीमान म्हणलें – “हांव दर आयतारा म्हजो मोबायल वापरचें ना. मोबायलाचो पुराय त्याग!” पयल्या आयताराच तिणें 15 फावटीं विचारलें – “आरे, व्हॉट्सअॅपाचेर कोणाचो मॅसेज आयला? इंस्टाग्रामाचेर कितले लायक्स आयल्यात?”
तिणें मोबायल हातांतल्यान सकयल दवरलो, पूण मोबायल अॅप स्टोर मनांत अजूनय उक्तो आशिल्लो!
सोनालीन थारायलें – “आतां हांव पिझ्झा आनी बर्गर खावप बंद करतलें. फकत निरोगी सॅलड!” पूण सॅलड खातना ती म्हणटा – “ओ वाव, हो टोमॅटो स्लायस पिझ्झा सारको दिसता… ह्या लेट्यूसाचो आकार बर्गरा सारको!”
अशें जालें की सॅलडाकच फास्ट फुडाचें रूप मेळ्ळें. त्याग न्हय – कल्पनाशक्तीचो खेळ!
एके आण्टीन म्हणलें – “आयच्यान हांवें ऑनलायन खरेदी बंद केल्या. केली तितली पुरो!” पूण रातच्या वेळार ती म्हणटा – “आगो, हांवें बंद केलां आं! आतां तूं म्हजे खातीर ऑर्डर कर.”
त्यागाची आॅर्डर अमेझॉनाचेर डिलिव्हर जाता काय?
तुकाराम महाराज म्हणटात –
आमचो त्याग खरो काय फकत नाटक – हें आमी स्वता तपासचें पडटलें. दुसऱ्यांनी सांगून ताचो कांयच फायदो ना.
आमी कितें शिकले?
खरो त्याग म्हणल्यार – जेन्ना आमी कितेंय सोडून दितात तेन्ना ताचीय यादूय सोंपता. चॉकलेट, मोबायल, पिझ्झा – कितेंय आसूं – मनांतल्यान गेलें जाल्यारूच तो त्याग. नाजाल्यार फकत कॉमेडी शो!
आतां सांगात, तुमी केन्ना असो ‘त्याग’ केला जो पोटांतल्यान हांसपाचो विशय थारला?
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
