भांगरभूंय | प्रतिनिधी
म्हापशें: हणजूण्यां सात वर्सां पिरायेच्या भुरग्याचेर हल्लो केल्ल्या पिटबूल सुण्याक शिवोलेच्या सुण्यांची जतनाय घेवपी एके खाजगी स्वयंसेवी संस्थेंत दाखल केला. पशुसंवर्धन आनी वशुवैजकी खात्या कडल्यान त्या सुण्याक ते संस्थे कडेन दिला.
त्या पिटबूल सुण्यान 29 ऑगस्सटाक प्रभास प्रेमानंद कळंगूटकार ह्या भुरग्याचेर हल्लो करून ताका फोडिल्लो. तातूंत जखमी जाल्ल्या प्रभासाचेर गोमॅकाँत उपचार चालू आसतना मरण आयिल्लें.
ह्या प्रकरणांत हणजूणें पुलिसांनी सुण्याचो धनी दुबावीत अब्दुल कादर ख्वाजा (रा. पिकेन पेडे, हणजूणें, मूळ पर्वरी) हाचे आड भारतीय न्याय संहितेच्या कलम 106 (1) खाला गुन्यांव दाखल करून अटक केल्ली.
म्हापशें न्यायालयान दुबाविताक 14 दिसांची न्यायालयीन कोठडी फर्मायल्या. पुलिसांनी ताका कोलवाळ बंदखणींत दवरला.
मजगतीं, प्रभासाच्या मरणाक कारण थारिल्ल्या पिटबूल सुण्याक लेगीत देखभाली खातीर ताब्यांत घेवपाची विनवणी पशुसंवर्धन खात्या कडेन केल्ली. ह्या प्रकरणांत फुडलो तपास हणजूणें पुलीस निरिक्षक सुरज गांवस हांच्या मार्गदर्शना खाला उपनिरिक्षक आदित्य नायक गांवकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
