तो आयलो…ताणें पळयलें….आनी ताणें गोल केलो…

भांगरभूंय | प्रतिनिधी

शाळेचे परिक्षेचो अभ्यास करप आनी ती पास जावप थोड्याच भुरग्यांक सोंपें दिसता, चड करून ते हुशार आसतात तेन्ना. मात ह्या १६ वर्सां पिरायेच्या तरणाट्या खेळगड्याक ती परिक्षा कठीण आशिल्ली, जेन्ना पांच कोटी देशवासियांनी आपली फुटबाॅल मॅचीच्या जैताची आस्त ताच्या जिवार बाळगिल्ली. मात. लामीन यामालान तांची आस्त पुराय केली. ताणें स्पेनाक युरो कपाच्या निमणे फेरयेंत पावयलो. फ्रान्सा आड एक सुंदर गोल करून. आतां आयतारा स्पेन आनी इंग्लंडा मदीं फायनल मॅच जातली. युरो कपांत गोल करपी तो सगल्यांत ल्हान खेळगडो थारला.
युरो कपाच्या निमण्या फेरयांनी गोल करप म्हणल्यार कांय खेळगड्यांच्या फुटबाॅल करियरांतली व्हडली कामगिरी आसता. मात यामालाक अजून खूब वाटचिरे हुपपाचे आसात, जैताच्यो घुडयो हुबोवपाच्यो आसात.

यामाल ल्हान आसतना ताच्या आवय- बापायक एका कॅलेंडराची लाॅटरी लागिल्ली. तातूंत जो जिखता, तांकां लिओनॅल मॅसी वांगडा फोटो काडपाची संद मेळपाची. मागीर ते फोटो कॅलेडराचेर छापपाचे. मॅस्सीन धाकटुल्या यामालाक न्हावपाक घाल्लें. कोणाक खबर तोय ल्हान पिरायेचेर मेस्सी सारको व्हडलो फुटबाॅल खेळगडो जातलो म्हूण. सध्या तो बार्सेलोनाक खेळटा. कोणाक ताका आपल्या क्लबा खातीर विकत घेवपाचो आसल्यार £868 दशलक्ष पौंड दिवचे पडटले, हे अटीक लागून सध्या तरी यामालाक बार्सेलोना क्लब सोडपाक मेळचो ना.

यामालाचो जल्म

यामालाचो जल्म 2007 वर्सा बार्सेलोनांत जालो. ताचो बापूय मुनीर (मोरोक्को) आनी आवय शैला (इक्वेटोरियल गिनीया- मध्य आफ्रिकेंतलो एक देश). बार्सेलोना पसून 32 किलोमिटर अंतरा वयल्या रोकाफोंडा हांगा तो रावता. मंगळारा यामालान फ्रान्सा आड गोल केलो तेन्ना ताची भयण आनी आवय स्टेडियमांत आशिल्ली. ताच्या काकाची रोकाफोंडांत बेकरी आसा. थंय ते रातीं व्हडली खोस मनयली. ताचो बापूय फक्त 33 वर्सांचो आसा. ल्हान पिरायेचेर ताचें लग्न जाल्लें.
यामाल सात वर्सांचो आसतना बार्सेलोनाच्या अधिकाऱ्यांनी ताका खेळटना पळयलो आनी ला मासिया अकादेमींत घालो. थंय शिक्षणा वांगडां फुटबाॅल शिकयतात. ताचो मॅस्सी ताका न्हावपाक घालतनाचो फोटो मुनीरान इन्स्टाग्रामाचेर घाला. त्या वेळार मॅस्सीय तसो पिरायेन ल्हानूच आशिल्लो. ‘बिगिनिंग ऑफ टू लिजेंड्स’ अशें कॅप्शन दिल्लो तो फोटो खूब व्हायरल जाला. पोरुं एप्रीलांत यामालान बार्सेलोना खातीर 15 वर्सां पिरायेचेर पयली मॅच खेळ्ळी. शेंकड्या परस चड वर्सांच्या क्लबाच्या इतिहासांतलो तो सगल्यांत ल्हान खेळगडो थारलो. आतां मेरेन तो क्लबा खातीर 54 मॅची खेळ्ळा, तर देशा खातीर 13.

2016 त रियल माद्रीदाचो स्टार खेळगडो सर्गे रामासोचो हात धरून ताचे वांगडा मैदानांत मास्कोट म्हूण येवपाचो यामालाक भोवमान मेळिल्लो. बापूय मोरोक्कोचो म्हूण मोरोक्कोन ताका आपल्या देशा खातीर खेळोवपाचो खूब यत्न केलो. तें पळोवन स्पेनान ताका पोरूं सप्टेंबरांत पिरायेच्या 16 व्या वर्सा आपले राष्ट्रीय टिमींत खेळयलो. ‘म्हजो जल्म आनी जीण स्पेनांत गेल्या. म्हणटकच हांव स्पेना खातीर खेळटलों’ अशें यामालान सांगलें. पूण ताणें आपल्या बुटाचेर मोरोक्को आनी इक्वेटोरियल गिनीयाचो बावटो पितारुन घेतला. स्पेनाच्या पंगडा खातीर पयलीच मॅच खेळटना ताणें जाॅर्जिया आड गोल केल्लो.

मध्यमवर्गीय मुस्लीम कुटुंबांतल्या यामाला वांगडा आदिदास कंपनीन वर्साक चार लाख पौंडाची कबलात केल्या. पयश्याचो धबधबो आतांच ओतपाक सुरवात जाल्या. सांजचो युरो कप खेळप आनी दिसभर अभ्यास करप, हें ताचें काम आशिल्लें. हांव चवथ्या वर्सांत शिकतां. म्हाका ऑनलायन क्लासी आसतात. सगलीं पुस्तकां हांव हांगा घेवन आयलां. सध्या सगलें बरें चल्लां. शिक्षक म्हजेर बेजार जायनांत अशी आस्त,अशें ताणें म्हणिल्लें. जूनाच्या निमण्या सप्तकांत तो पास जाला, अशी खबर आयली आनी ताणें सुस्कारो सोडलो.
आतां सगल्या स्पेनाची नदर आयतारा ताचेर आसतली. युरो कप कोण जिखता ताची उमळशीक संवसारांतल्या फुटबाॅल मोगींकूय आसा.