भांगरभूंय | प्रतिनिधी
पेडणें: तोरशेंच्या सरपंचपदार पुजा साटेलकार हांची विरोधाविणें निवड जाली. सरपंच छाया शेट्ये हांणी अलिखीत कबलाती प्रमाण सरपंचपदाचो राजिनामो दिले उपरांत हें पद रितें आशिल्लें. हे खातीर 25 तारखेर पंचायत मंडळाची बसका जाली. तातूंत सरपंचपदा खातीर वेंचणूक घेतली. ह्या वेळार पुजा साटेलकार हांचो एकूच अर्ज आयिल्ल्यान तांची विरोधाविणें निवड जाली.
ह्या वेळार उपसरपंच आत्माराम तोरस्कार, पंच छाया शेट्ये, पंच स्वाती तोरस्कार, पंच प्रार्थना मोटे, पंच उत्तम वीर , पंच रमेश बुटे आनी हेर हाजीर आशिल्लीं.
पुजा हांची निवड जाले उपरांत आमदार प्रवीण आर्लेकार हांणी तांकां परबीं भेटयलीं. ह्या वेळार मोपा सरपंच सुबोध महाले, आदले जिल्लो पंचायत वांगडी रमेश सावळ आनी सूर्यकांत तोरस्कार, नागरीक, समर्थक व्हडा संख्येन हाजीर आशिल्ले.
आमदार आर्लेकार हांणी सांगलें, पंचायत मंडळान एकठांय रावन समाजाच्या बर्या खातीर केल्लें काम गांवचे उदरगती खातीर म्हत्वाचें थारता. ह्या पंचायत मंडळाक आपलो पुरायेन तेंको आसा. सरकारा वरवीं पंचायत वाठाराचे उदरगती खातीर प्राधान्य दितले. पुजा साटेलकार हांणी सांगलें, सरकाराचे मजतीन पुराय पंचायत वाठाराची उदरगत करपाचे पुराय यत्न करतली अशें आस्वासन तांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
