तोयार आंदोलनाक मोडण

भांगरभूंय | प्रतिनिधी

दोनूय वटांनी हो प्रस्न शांतपणान चर्चे वरवीं जाता तितले बेगीन सोडोवपाक जाय.

चिंबला तोयार तळ्या लागसार जावपी युनिटी माॅल आनी प्रसासन स्तंभ इमारती आड फाटले 18 दीस चालू आशिल्ल्या आंदोलनाक जिल्हो आनी सत्र न्यायालयान काल दनपरां मोडण दिलें. ह्या माॅलाचो बांदकाम परवानो रद्द केला, तशेंच प्रकल्पाचे वटेनचे पंचायत संचलनालय आनी बिडीओ हांचे सगले आदेशूय रद्द केल्यात. निर्णय गांवकारां वटेन लागला, तरीय प्रकल्प पूर्णपणान रद्द जायना, तो मेरेन आंदोलन चालूच उरतलें, अशें आंदोलक म्हणटात. मुख्यमंत्र्यान गांवकारां कडेन चर्चा करपाची तयारी दाखयल्या. सरकाराची बाजू आयकून घेवची, अशें तांणी म्हणलां. आंदोलकां कडेन मुख्यमंत्री एकलेच चर्चा करतले, ते बसकेक थळावे आमदार आसचे नात, अशें पर्यटनमंत्र्यान स्पश्ट केलां. हो प्रस्न बरोच तापिल्ल्यान मुखार कितें जाता, ताचे कडेन पुराय गोंयकारांचें लक्ष आसा. दोनूय वटांनी हो प्रस्न शांतपणान चर्चे वरवीं जाता तितले बेगीन सोडोवपाक जाय. मजगतीं, थळाव्या लोकप्रतिनिधींनी खबरां चॅनलांक प्रतिक्रिया दितना उज्यांत तेल ओतिल्ले सारकें जावचें ना, हाची जतनाय घेतल्यार बरी. कारण आंदोलकांचे व्हिडियो, म्हणणें आयकतना ते कितले फुर्योज जाल्यात, तें स्पश्ट जाणवता. हाचे पयलीं 25 मे 2011 त बाळ्ळींत एसटी भावांचें व्हडलें आंदोलन जाल्लें. त्या वेळार दोगां तरणाट्यांक मरण आयिल्लें. ह्या आंदोलनाच्यो कोडू यादी अजून गोंयकारांच्या मनांत आसात. कायम उरतल्यो. परत तसलें कांय खंयच घडयें न्हय. घावे भरतात, पूण ताचें खत केन्नाच पुसून वचना.
तोयार तळें हें इतिहासीक. 1908 त पणजे शाराक उदक नाशिल्लें, तेन्ना ह्या तळ्यांतल्यान पणजे रावप्यांक उदकाची पुरवण केल्ली. पर्यावरणाचे नदरेन म्हत्वाचें आशिल्लें हें तळें इबाडटलें, पाणथळ वाठाराचेर हावळ येतली, परंपरीक वेवसायांक धपको बसतलो अश्या साबार दुबावांक लागून हें आंदोलन 28 डिसेंबराक सुरू जाल्लें. सत्र न्यायालयान प्रकल्पाक 6 डिसेंबराक स्थगिती दिवन 8 जानेवारी मेरेन काम ‘जैसे थे’ दवरपाचो आदेश दिल्लो. मात, जिल्हो पंचायतीचे वेंचणुके उपरांत कामाक सुरवात जाली, असो आरोप करून आंदोलन खर जालें. ग्रामसभेन तीन फावटीं माॅल आनी स्तंभ हे दोनूय प्रकल्प नाकात, असो थाराव घेवनूय सरकारी यंत्रणांनी 24 वरां भितर धडाधड कायदेशीर परवानग्यो दिल्यो, अशेंय आंदोलकांनी याचिका घालतना म्हणलां. ह्याच मुद्द्याचेर न्यायालयान परवानो रद्द केला. आतां सरकार ह्या निवाड्याक आव्हान दिता, भासाभास करून आंदोलकांचें मतपरिवर्तन करता काय प्रकल्पूच रद्द करता, तें कळटलें. तोयार तळ्या लागसारच्या कांय इमारतींक मात कोणें विरोध करूंक ना, अशें मतूय थोडे उक्तायतात.
ह्या दोनूय प्रकल्पांच्या कामाक सुरवात करचे पयलीं सरकारी यंत्रणांनी गांवकारां कडेन भासाभास करपाक जाय आशिल्ली. आतां ती जाता, ही बरी गजाल. नवे प्रकल्प येतात, तेन्ना वांगडा रोजगार घेवन येतात. पूण गांवकारांचो विरोध आसल्यार तांकां प्रकल्पांचे फायदे पटोवन दिवंक जाय. तरीय तांकां तो नाका जाल्यार फाटीं घेवं येता. आयआयटी घेतली तशी! कारण निमाणी जनता ही सर्वोच्च. ह्या माॅला वांगडा सरकारी कार्यालयां एकठांय आशिल्ली इमारतूय बांदपाचें थारलां. पणजे पाट्यार ती बांदू येताली. पूण थंयचे भोवतेक जागे खाजगी कंपनींक दिल्यात. थंय आतां कांय आकांताच्यो इमारती येतात. सरकारी कार्यालयां बस स्टॅण्डार जाल्यार लोकांक बऱ्याक पडटलें. खाजगी गाडयोय उण्यो जातल्यो. प्रकल्प हाडटना रोजगाराचोय विचार जाय. प्रत्येक उद्देगीक वसणुकेंत हजार- देड हजार नोकऱ्यो दिवपी (80 टक्के गोंयकारांक) आघाडेच्या कंपनींचे दोन तरी प्रकल्प हाडप बरें. पूण, हाचे मुखार पर्यावरण संवेदनशील जाग्यां पसून सगलेच पयस रावया! समाजीक भलायकेचे नदरेन तें बरें.