भांगरभूंय | प्रतिनिधी
तैवान, खबरां संस्था : वादग्रस्त सुदारणा विधेयकाचेर वाद जाले उपरांत शुक्रारा तैवान संसदेंत गोंदळ निर्माण जालो. ताचे मदीं संसदेचे वांगडी गुओ गुओवेन हांणी बेगोबेग विधेयकाचे कागदपत्र ओडून घेतले आनी विधेयक पास जावचें न्हय म्हणून नाटकी पद्दतीन पळ काडलो. हो व्हिडियो व्हायरल जाला. बेसबाॅल खेळगडो बाॅल घेवन पळटा, तशे ते विधेयक घेवन भायर पळून गेले.
फाटल्या सोमारा वेंचून आयिल्ले अध्यक्ष लाय चिंग- ते हे सत्तेर येवपाच्या फकत कांय दिसां आदीं ही घडणूक घडल्या. फाटल्या जानेवारींत जाल्ली वेंचणूक तांच्या पक्षान जिखल्या, मात तांच्या डेमोक्रेटिक प्रोग्रेसिव्ह पक्षाक विधीमंडळांत भोवमत ना.
कुओमितांग (केएमटी) ह्या विरोधी पक्षाक डीपीपी परस चड सुवाती आसात, पूण संसदेचेर एक हाती नियंत्रण दवरपा इतल्यो सुवातो नात. देखून, ते तैवान पीपल्स पार्टी (टीपीपी) वांगडा मेळून आपलें ध्येय फुडें व्हरपाक सोदतात. संसदेंत फट उलोवपी अधिकाऱ्यांक ख्यास्त दिवपाचे वादग्रस्त येवजणे सयत सरकाराचे कृतीचेर नदर दवरपा खातीर संसदेक चड हक्क दिवपाची इत्सा विरोधी पक्षाक आसा.
ह्या विधेयकाचेर मतदान जावचे पयलींच कायदेमंडळांतले कांय वांगडी बोवाळ करीत एकामेकांक विधीमंडळा भायर धुकलपाक लागले. उपरांत खासदारांनी सभापतीच्या जाग्या कडेन वचून मेजाचेर उडी मारून कांय वांगड्याक धरून दवरले. उपरांत गोंदळ जालो. पडून तकलेक घावो जाल्ल्यान एका खासदाराक हॉस्पिटलांत दाखल केल्ल्याची म्हायती खलीज टायम्सान दिल्या.
केएमटी आनी टीपीपीन (दोनूय पक्ष) योग्य सल्लो घेनासतना प्रस्ताव मुखार व्हरपाचो यत्न केला असो आरोप डीपीपीन केलो आनी ताका “सत्तेचो असंविधानीक गैरवापर” अशें म्हणलां. दक्षिणे कडल्या चियायी शाराचें प्रतिनिधित्व करपी डीपीपीचे वांगडी वांग मेई- हुई हांणी सांगलें, “आमकां विरोध कित्याक करतात? देशांत ‘एकूच’ मत आसचें न्हय म्हणून आमी चर्चा करपाक सोदतात”.
चीन लागसारच्या तैवानाच्या प्रशासनांतल्या किनमेन जुंव्यांचें प्रतिनिधित्व करपी केएमटीची खासदार जेसिका चेन हांणी ह्या सुदारणांचो हेतू, कार्यकारी शाखेचेर विधीमंडळाची देखरेख आनीक सुदारची हो आसा असो युक्तिवाद केलो. डीपीपीक हें विधेयक पास जावचें न्हय अशें दिसता. कारण तांकां सगली सत्ता आपल्या हातांत जाय.
2020 वर्सा अमेरिकेंतल्यान दुकराचें मांस आयात करपा विशीं मतभेद जाल्ल्यान केएमटीच्या खासदारांनी दुकरांच्यो आंतकड्यो चेंबराच्या माळयेर हाडून उडयिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
