भांगरभूंय | प्रतिनिधी
आयजूय तोच जैतिवंत थारलो…अजुनय हांव ल्हान आसा…ताचीं सपनां पळयतां….. एका बालिश, पोरकट अल्लड आनी वयांत आयिल्ले चलये सारकें…
म्हजे पिराये परस धा वर्सां व्हड चल्याच्या मोगांत हांव कशें पडलें हाचें म्हाका अजाप दिसता. दिसपाक एकदम धड-धाकट, राकट म्हणजे खंयचीय चली ताका चुकून लेगीत पळोवपाक ना असो. कॉलेजीक येवन तवनासपणां करप, बशिल्ल्या जाग्यावेली जमीन पान खावन थुकुन तांबडी करप…. बुलेट चलोवन सगळी कॉलेज हालोवन उडोवप, पूण चलयेंच्या बाबतींत फुल रीस्पेक्ट.
तवनास चल्यांचो कॉलेजीक आसताना त्रास जातालो. तांणी केल्ल्या प्रोपोजाक न्हयकार दिलो जाल्यार टु-व्हिलराचें वारें सोड, सीट पिंजून उडय असले तांचे उद्योग चलताले. हाच्या वांगडा इश्टागत जातकच ह्या सगळ्या त्रासांतल्यान हांव सुटलें…
म्हाका ताचो आदार कसो दिसतालो….आनी हांव ताच्या मोगांत पडलां हें म्हाका खूब कळावान कळ्ळें. एकाद्रो चलो म्हजे खातीर मुसमुसुन रडटा हें पळोवन तर म्हजें काळीज तुटून वतालें. हांव तेन्ना 21 वर्सांचें. कसलोय निर्णय घेवपाची तितली अक्कलय नाशिल्ली. घरच्यांक फट सांगून हांव ताच्या वांगडा भोंवपाक वतालें.
तांणे कॉलेजींक आसतना म्हाका पिशें लायिल्लें. ताणें पिशें लायिल्लें म्हणचे परस हांवूच ताचेर भुलिल्लें. इंटर कॉलेज नाट्य सर्तींत तो नाटकुली बरयतालो, ती बसयतालो आनी सेगीत कॉलेजीक, सर्तींत जैतिवंत करतालो. क्रिकेट टिमीचो तो कॅप्टन आशिल्लो. वाद-विवाद सर्तींत तो बाजी मारून वतालो आनी म्हजें काळीज चोरून व्हरपाक तोच जापसालदार आशिल्लो.
खूब फावटीं अशे खीण आयले की ताच्या मनांत आयिल्लें जाल्यार तो आपणाक जाय ती मजा म्हजे वांगडा करुंक शकतालो….. आनी हांवूंय ताका आडावचें नाशिल्लें. उलट म्हाकाच केन्ना केन्ना इत्सा जाताली. ताका वेंग मारून ताचे फाटीर हात फिरयन दिसतालें… पूण तो म्हाका थंयच आडायतालो. सांगतालो आनी समजायतालो की, तु खूब ल्हान आसा….हें सगळें करप बरोबर न्हय…
आनीक थोड्या दिसांनी ताचें लग्न जालें, पूण म्हाका ताची संवंय जाल्ली. एक मन सा्ंगतालें की किद्याक ताच्या संवसारांत धवळाधवळ करता? पूण मनाक कितलेंय समजायलें तरीय म्हजो हात कळत- नकळत फोना कडेन वतालो… ताका फोन करपाक…
हांव ओगीच रडटालें आनी तो म्हाका समजावपाचो यत्न करतालो. समजयतालो की तूं लग्न कर. तुजें मन संवसारांत गुंतुन वतलें. पूण ताचे बगर जगप म्हणजे एक खर ख्यास्त आशिल्ली. इतलेंच न्हय, तर ताची रखेल म्हणून लेगीत हांव रावपाक तयार आशिल्लें.
ताणें म्हाका खुबूच सांबाळ्ळें…. नाजूक फुलासारखें जपलें. तीस वर्सां पिराय आशिल्ल्या एका चल्याक, वीस वर्सां पिरायेची सुंदर चली आपले सर्वस्व दिवपाक तयार जाल्ली, पूण ताणें केन्नाच मोह केलो ना. तो म्हाका मेळपाक येतालो. ताचे, ताणें ताच्या बायले वांगडा काडिल्ले फोटो पळयतकच म्हजी चिडचिड जाताली. तुका आतां तुजी हक्काची बायल मेळ्ळी… आतां तुका म्हजी काळजी करपाची गरज ना. ताणें आपलो तोल केन्नाच वचपाक दिलो ना. म्हज्या बालीशपणाक परिस्थितीचें भान हाडपाचो पुरेपुर यत्न केलो…
आज म्हाका एक सुंदर चली आसा. म्हजो घोव बरे कंपनींत उंचेल्या पांवड्यार कामाक आसा. तो म्हजेर खूब मोग करता…सगळें सुखांत चल्लां.
कॉलेजीच्या दिसांची याद जाली की ताची याद म्हाका सतायता… हांव बेचैन जातां. फेसबुकावेल्यान ताका हांवें कॉनटँक्ट लेगीत केलो. मेळपाक येता काय म्हणून विचारलें. सुरवातीक तो नाका म्हणपाक लागलो. पूण हांवेंनूच चड फोर्स करतकुच तो तयार जालो… सुंदर अशा स्पायस फार्माचेर मेळपाचें आमी थारायलें.
आरशाफुडें नट्टना वेगळीच उर्बा म्हज्या आंगांत शिरिल्ली. लिपस्टिक सारकी लायल्या काय ना हें परत परत बारीकसाणेन पळयलें. दिवाळेक घेतिल्ली मळबा कोराची नवी साडी न्हेंसली. ताका आवडटा म्हणून मोगऱ्यांचो झेलो माथ्यार माळ्ळो. ताका आवडटा असलो सेंट मारलो आनी थारायिल्ल्या वेळा प्रमाण स्पायस-फार्मार पावलें.
एक-एक मिनीट म्हाका वर्सा सारकें भासपाक लागिल्लें. केन्ना तो येतलो आनी हांव ताका पळयत रावतलें अशें म्हाका जाल्लें. कॉफी कोराची पॅट आनी ताचेर मळनॅ कोराचें टी-शर्ट ताका सोबून दिसता. तोच ड्रेस आयज तो घालून आयल्यार पुरो….
खूब वेळ जालो तो येवंकच ना. ताका फोन लायलो पुण संपर्कांत येना म्हणून मॅसेज येवपाची वाट पळोवपाची थारायलें… बरोच वेळ जालो तरीय ताजो पत्तो नाशिल्लो. म्हाका ताचो मनांतल्यान राग आयिल्लो. चिडचीड करत हांवेंन घरा वचपाक रिक्षा आपयली… ताचो काँल आयलो आनी हावरटा सारको हांवें तो घेतलो…
“आयज तूं खुबूच सुंदर दिसतालें… कॉलेजीक वर्सुकी दिसा पयलेच फावटी साडी न्हेंशिल्लें ताच्या परस चड सुंदर… चड तेपान आयज तुका पळयलें. तुजे चली म्हणजे तुजी कार्बन कॉपी… तुज्या सारखेंच सुंदर आनी हुशार. फेसबुकार ताका पळयिल्लें…
थोड्यो यादी ह्यो यादीच म्हणून बऱ्यो आसतात. तांकां फुलां सारखे, फुलपाखरा सारखे जपूंक जाय.”
“तुका आयज पळयताच एक सुंदर अप्सरा सर्गांतल्यान देंविल्ल्याचो म्हाका भास जालो… आमचे कॉलेजींतले ते मंत्र मारिल्ले दीस म्हाका याद आयले. .. कितलें बदल्लां गो तूं?… पूण सुंदरतायेन तुजो वांगड अजून सोडूंक ना. म्हाका मोह जातलो आशिल्लो आनी हांव बेधुंद जातलों आशिल्लों… आनी तेच खातीर तुज्या फुड्यांक येवंक ना. तूं तुजी जतनाय घे… सांबाळ तुका…. सद्दां सकाळीं योगा कर, सांजवेळेर कथ्थक नाचाची प्रॅक्टीस चालूच दवर आनी तुज्या घरच्यांचींय मनां जिंखून घे….”
फोन कट जालो…परत लागपाक ना हाजी म्हाका पुराय खबर आशिल्ली… आयजूय तोच जैतिवंत थारलो… अजुनय हांव ल्हान आसा… ताचीं सपनां पळयतां….. एका बालिश, पोरकट अल्लड आनी वयांत आयिल्ले चलये सारकें…..
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
