भांगरभूंय | प्रतिनिधी
फोंडें : हांगाच्या पुलीस स्टेशनाच्या फाटल्या रस्त्याचेर बेशिस्तपणान गाडी पार्क केल्ल्यान उपअधीक्षक शिवराम वायंगणकार आनी निरीक्षक विजयनाथ कवळेंकार हांचीं वाहनां आडकून उरिल्ल्याची घडणूक मंगळारा सकाळीं घडली. बेशिस्तपणान आपलें वाहन रस्त्यार पार्क करून एक बायल पणजे गेल्ल्यान पुलीस वाहन चालकांक त्रास सोंसचे पडले.
पुलिसांनी ते बायले कडेन संपर्क केले उपरांत तिच्या घोवान येवन गाडी कुशीक काडली. मात रस्त्यार गाडी पार्क करून पणजे गेल्ले ते बायलेक आतां तालांव भरचो पडटलो.
फोंडें शारांतली बेशिस्त पार्कींग वेवस्था आडावपा खातीर पालिकेन हालींच पे पार्कींग करपाचो निर्णय घेतला. पुलीस स्टेशना लागसार आशिल्ले मेकळे सुवातेर व्हडा प्रमाणांत लोक गाडयो पार्क करतात. हे सुवातेरूय पे पार्कींग करपाचो निर्णय पालिकेन घेतला. पुलिसांनी दोन- तीन दिसां आदीं ह्या वाठारांत बॅरिकेट घालून गाडयो पार्क करपाचें बंद केल्लें. त्याच वाठारांतल्यान पुलिसांच्या फाटले वटेन उपअधीक्षक आनी निरीक्षकांचीं वाहनां पार्क करतात.
मंगळारा सकाळीं एके बायलेन उपअधीक्षक आनी निरीक्षक हांची वाहनां यो-वच करपी रस्त्यांचेरूच गाडी पार्क केली आनी ती पणजेचे बसीन बसून गेली. उपअधीक्षक शिवराम वायंगणकार हांकां कार्यालयांत घेवन येवपा खातीर चालकांक बरेच त्रास सोंसचे पडले. सुमार अर्दें वर पुलिसांनी पार्क केल्ल्या गाडयेच्या ड्रायव्हराची वाट पळयली. उपरांत पुलिसांनी बॅरिकेट्स कुशीक काडून उपअधीक्षकांची गाडी भायर काडली.
येरादारी पुलिसांनी गाडी चालकांचो नंबर घेवन, तपासणी करून बायल ड्रायव्हराचो फोन नंबर मेळयलो. तिका फोन केले उपरांत ही बायल पणजे वता अशें समजलें. उपरांत तिणें घोवाक गाडी कुशीक काडपा खातीर धाडटां अशें सांगलें. सुमार ९.३० वरांचेर तिच्या घोवान येवन गाडी कुशीक काडली. बेशिस्तपणान गाडी पार्क केल्ले हे बायलेक पुलीस तालांव दिवपाचे आसात.
मजगतीं, राज्यांत जायते कडेन मेळत थंय मेळत तश्यो गाडयो पार्क करतात. पणजे जुंता हावसा कडेन तर दोनूय वटेन गाडयो पार्क केल्ल्यो आसतना लोक मदीं गाडयो पार्क करतात, मात पुलीस तांकां कांयच करीनात अशें दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
