भांगरभूंय | प्रतिनिधी
छत्रपती संभाजीनगरांतली (आदलें औरंगाबाद) एक दुर्दैवी घडणूक. जंय बंद जाल्ली ड्रेनेज नितळ करपाक मॅनहोलांत देंविल्ल्या तीन मजुरांक विखारी वायूक लागून मरण आयलें, पूण खंयच्याच प्रसार माध्यमान वा राजकी पक्षान ताची दखल घेतली ना.
अशा दुर्दैवी घडणुकांनी जायते जाण मरतात. दर म्हयन्याक जायते मजूर योग्य सुरक्षीतताय नाशिल्ल्यान उंच बांदकामांतल्यान पडून कायमचे दिव्यांग जातात वा मरतात. घाणयारें उदक जमनी पोंदच्यान व्हरपी व्हडलीं बंदिस्त गटारां निवळ करपाक भितर देंविल्ले सफाय कामगार भितरल्या विखारी वायूचो संपर्क आयिल्ल्यान मरतात. अशे तरेन असैमिक मरणांचो आंकडो शेंकड्यांनी आसता, पूण ते गरीब, सामान्य नागरिक आशिल्ल्यान प्रसार माध्यमां, समाज, पुलीस, न्यायालया तांची दखल घेना. सुशांत सिंह, पूजा चव्हाण सारकिल्ल्यो नामनेच्यो व्यक्ती आशिल्ली जाल्यार सगळी यंत्रणां जागी जावपाची. प्रसार माध्यमा 24 वरां ब्रेकिंग न्यूज चलोवन आरड मारपाचीं. राजकी फुडारी आनी तांचे वावुरपी निदर्शनां, रस्तो आडावप, धरणा धरपाचे, पूण सामान्य गरिबांच्या मरणाक कोणाकूच पडिल्लें ना.
हांगाच्यो यंत्रणाय तोच विचार करतात आसूंक जाय, देखूनच गरिबांक मरण आयले उपरांत तांकां न्याय मेळोवपाक कोणूच मुखार येनात. जल्मजात गरीब हो ह्या देशांत शाप. हांगाची यंत्रणा सेलिब्रिटींक न्याय दिवपाक जितली जागृत आसा तितलीच गरीबांक न्याय दिवपाक उदासीन आसा. गरिबांच्या जिविताक हांगा मोल ना. ते जियेतात काय मरतात हाचो कोणाक फरक पडना, हें कोडू आसलें तरी वास्तव आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
