भांगरभूंय | प्रतिनिधी
फाटलीं पांच वर्सां चलतालो हो धंदो
दौसा, खबरां संस्था : खाणां- जेवणाच्या वस्तूंत दरेकलो दर दिसा दुदाचो उपेग खंयच्या ना खंयच्या रुपांत करताच. दिसपट्टे जिणेंत दूद हें एक पुश्टीक अन्न. तुमी दर दिसा दूद वापरतात जाल्यार जतनाय घेयात, कारण बनावट दूद तयार करपी गट बाजारांत सक्रीय जाल्यात. खरें म्हणल्यार भेसळ करप्यांक फांशीची ख्यास्त जावची हे खातीर कायद्यांत दुरुस्ती करपाक जाय. बनावट दूद तयार करपी गट सिंथेटिक दूद तयार करून बाजारांत विकता, अशें दिसून आयलां. दिवाळी आनी उत्सवाचो हंगाम पळोवन नकली दूद, खोया आनी मावा तयार करपी लोकां आड राजस्थानांतल्या दीग जिल्ह्यांतल्या कैथवाडा हांगां पुलीस, भलायकी अधिकारी आनी सीआयडी गुन्यांव फांट्याच्या पंगडान दोन दिसां पयलीं कारवाय केल्या. ते दिसाक ५० हजार लिटर दूद तयार करून विकताले. हें दूद चड प्रमाणांत पियेत जाल्यार मोडशी आनी हेर दुयेंसां जावं येतात, अशें भलायकी अधिकाऱ्यांनी सांगलें. हो धंदो फाटलीं पांच वर्सां चलतालो.
कैथवाडा शारांत ‘सरस दुदा’च्या नांवान कृत्रीम दूद तयार करपी कारखान्याचेर पुलिसांनी धाड घाली. थंय तयार केल्लें कृत्रीम दूद दौसा जिल्ह्यांतल्या बांदकुई वाठारांतल्या कांय ल्हान कारखान्यांक, दुकानांक धाडटाले. ह्या प्रकरणांत वट्ट 12 जाणांक ताब्यांत घेतल्यात, अशें अतिरिक्त पुलीस महासंचालक दिनेश एम एन हांणी सांगलें.
दिसाक ५० हजार लिटर दूद
कैथवाड्यांतल्या कारखान्यांत दर दिसा सुमार 50 हजार लिटर कृत्रीम दूद तयार करून विकताले, अशें दिनेश एम एन हांणी सांगलें. कारवायेंत सुमार 50 हजार लिटर कृत्रीम दूद आनी तीन ल्हान टँकर तशेंच व्हड प्रमाणांत चीज आनी मावा जप्त केला. भलायकी खात्याच्या पंगडान दुदाचे आनी हेर खाणां-जेवणाचे नमुने घेवन ते चांचणी करपा खातीर धाडल्यात.
रसायनां पसून कृत्रीम दूद
हे लोक कारखान्यांतल्यान ल्हान टँकरां वरवीं दुदाची पुरवण दौसा जिल्ह्यांतल्या तीन, तशेंच हेर जायत्या दुकानांक, ल्हान कारखान्यांक करताले. सिंथेटिक दुदांत खऱ्या दुदाचो एक थेंब लेगीत ना. हायड्रोजन पेरॉक्सायड, युरिया, ताड तेल, काॅस्टीक सोडा, दुदाचो पिठो आदी यंत्रां वरवीं थारावीक प्रमाणांत घेवन हें दूद तयार करतात, अशें दिनेश हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
