भांगरभूंय | प्रतिनिधी
आंतरराष्ट्रीय संबंद कशें तिगोवप आनी कोणा बराबर तिगोवन दवरप हाची जाण भारताक बरे तरेन आसा. ताका लागून डोनाल्ड ट्रम्प हांणी भारताक कसलोच आंतरराष्ट्रीय सल्लो दिवचो न्हय. अमेरिकेक जर बरो सल्लो जाय आसत जाल्यार तांणी भारता कडल्यान घेवचो. जेणे करून तांचें बरेंच जातलें. ट्रम्पान म्हणलें ब्रेकींग न्यूज दिवं? भारत रशिये कडल्यान तेल विकतें घेवपाचें थांबयतलो. पूण अशें कांयच ना. कारण डोनाल्ड ट्रम्प दीसपट्टे देशांत वा विदेशांत वादाचे आनी कांयच अर्थ नाशिल्ले उलोवप करीत आसता. हातूंत कसलीच नविदाद ना वा कसलेंच तथ्य लेगीत ना. तेच पद्दतीचें भारत-रशिया तेल धोरणा विशीं ट्रम्प स्वताची फाट थोपटावन घेवपी उलोवप केलां. संवसारांतल्या खूबशा देशांक कल्पना आसा की अमेरिका केन्नाय आनी कोणाकूय घाताक घालूंक शकता. ताका लागून आयचे परिस्थितींत अमेरिका आनी खास करून डोनाल्ड ट्रम्प विस्वासाक पात्र थारिल्ले नात. संवसाराक खबर आसा की नोबॅल शांती पुरस्कार मेळचो हे खातीर ट्रम्प दरेक देशाच्या दारांनी भोंवत आशिल्लो आनी म्हाका नोबॅल पुरस्कार मेळचो हे खातीर पुराय ताकदीनिशीं दबावतंत्राचो वापर करीत आशिल्लो. पूण ताचे पुराय यत्न निर्फळ थारले.
नोबॅल पुरस्कार मेळचो हे खातीर ट्रम्प पाकिस्ताना मुखार लेगीत बागवलो. पूण नोबॅल शांती पुरस्कारा पसून डोनाल्ड ट्रम्पाक कितलोसोच पयस भायर शेंवटून मारलो. अशे तरेन ट्रम्पाची पुरस्काराची कथा, प्रथा, व्यथा पुराय संवसारान उक्त्या दोळ्यांनी पळयली आनी ताची आशा आकांक्षा मातयेभरवण जाली. खंयचोय पुरस्कार आसूं तो मागचो पडना, मेळोवचो पडटा. हे खातीर ते पद्दतीची प्रतिमा तयार करची पडटा, कश्ट काडचे पडटात आनी खंयचोय पुरस्कार हें कश्टाचें फळ आसता. जांचें नांव केन्नाच चर्चेंत नाशिल्लें त्यो दक्षीण अमेरिका खंडांतल्यो व्हेनेझुएलांत लोकशायेक प्रोत्साहन आनी हुकुमशाये आड झुजपी विरोधी पक्ष फुडारी मारिया कोरिना मचाडो हांकां 2025चो शांततायेचो नोबॅल पुरस्कार जाहीर जालो. मारिया कोरिना मचाडोक हो मेळिल्लो पुरस्कार तांच्या कतृत्वाच्या कामगिरीचेर मेळ्ळा, आनी नोबॅल पुरस्काराचे सर्तींत आशिल्लो ट्रम्प खंयचे कडेन नाच्च जालो. ताका लागून डोनाल्ड ट्रम्पाच्या खंयच्याय उलोवपा कडेन वा भारता सयत खंयचोय देश बारकायेन लक्ष दिना. रशिया आनी भारत अशे देश आसात की जसो शब्द दितात तशें पाळटात लेगीत. आनी दिल्लो शब्द काळ्या फातरा वेली धवी रेश आसता. ताका लागून भारतान तेल रशिया कडल्यान खरेदी करचें काय ना हें भारत-रशिया हांची विदेश निती थारायता. ताका लागून रशिया विशीं अमेरिकेन कितलोय दबाव तंत्राचो वापर केलो तरी भारत-रशिया संबंद कशेच इबाडचे नात ही गजाल ट्रम्पान लक्षांत दवरूंक जाय. कारण पुराय संवसाराक बरे तरेन खबर आसा ट्रम्प कितें आसा तो.
ट्रम्पाच्या खूबशा चुकीच्या निर्णयाक लागून अमेरिका अडचणींत आयल्या आनी डोनाल्ड ट्रम्प स्वताच्या सुवार्था खातीर खूबशा देशांचो घात करून तांकां रगताच्या कोंयडांत धुकल्ल्यात हाची खूबशीं उदाहरणां संवसारा मुखार आसात. अमेरिकेंतल्या विदेशी नागरिकांनी ट्रम्पा आड वचत आसात. हाचें जितें उदाहरण म्हणल्यार डोनाल्ड ट्रम्प प्रशासनान नव्या एच 1बी व्हिसा फीचें शुल्क एक लाख डॉलर (सुमार 88 लाख रुपया) इतलें वाडयिल्ल्याच्या निर्णयाचेर यूएस चेंबर ऑफ कॉमर्सान कोलंबियांतल्या न्यायालयांत सरकारा आड खटलो दाखल केला. हाचे वेल्यान स्पश्ट जाता की ट्रम्प प्रशासनाचो निर्णय दिशाहीन आसून बेकायदेशीर आनी मनमानी आसा असो दावो याचिकेंत केला आनी ही गजाल खरी
आसा.
अशाच चुकीच्या निर्णयाची पुनरावृत्ती भारत-रशिया संबंदा विशीं ट्रम्प करीत आसा. युक्रेन-रशिया झूज सोंपोवपाच्या उद्देशान डोनल्ड ट्रम्प म्हणटा, भारत आतां रशिये कडल्यान तेल खरेदी करचो ना अशें आस्वासन भारताचे प्रधानमंत्री आनी म्हजे इश्ट नरेंद्र मोदी हांणी म्हाका दिलां असो दावो डानाल्ड ट्रम्पान 15 ऑक्टोबराक केला. तशें पळोवंक गेल्यार भारतान अशे पद्दतीचें कसलेंच पावल उबारिल्लें ना, आनी उबारचो लेगीत ना. कारण भारतान रशियेक आनी रशियेन भारताक खूबशा संकश्टा वेळार दोगांनीय एकामेकांक मजत आनी सहाय्यता केल्या आनी अमेरिकेचो विचार करीत जाल्यार अमेरिकेन सदांच पाकिस्तानाक मजत करून भारताचे फाटीत सुरो तोपपाचें काम केलां. ताका लागून डोनल्ड ट्रम्पाच्या उलोवपा वेल्यान स्पश्ट लक्षांत येता की ताची बुद्धी भ्रश्ट जाल्या. आंतरराष्ट्रीय बाजारांत रशियाचें तेल आयजूय सगल्यांत सवाय आनी किफायतशीर आसा. आनी रशियाचें भारता बराबरचे ऊर्जा संबंद हे भारताच्या राष्ट्रीय हिता कडेन सुसंगत आसात. संवसारीक बाजारांत रशिया मुखार अमेरिकेन खूबश्यो आडमेळीं हाडल्यो. पूण ताका किंकोत करून रशियेन सेगीत बांदिलकी सांबाळ्ळ्या. तशेंच पर्यायी पुरवण सांखळी आनी पेमेंट सिस्टिमां मदीं लेगीत लवचिकताय दाखयल्या. रशिये सारकें धाडस अमेरिके मदीं मात लेगीत ना ही गजाल स्पश्ट दिसून येता. येता त्या कांय म्हयन्यां भितर भारत रशिये कडल्यान तेल खरेदी करप वाडयतलो. म्हणल्यार डोनाल्ड ट्रम्प हांची खेळी तांचेरूच बुमरँग जातली हें दिसून येतलें. ब्लूमबर्गाच्या रिपोर्टा प्रमाण रशिया तांचे कडल्यान तेल खरेदी करपा खातीर भारताक दुपेटीन सवलत दितली. रशियान नोव्हेंबरा सावन भारता खातीर ब्रेंट क्रुडाच्या लोडिंगाचेर प्रती बॅरल 2 डॉलर ते 2.50 डॉलर मेरेनची सूट दिवपाची ऑफर दिल्या. भारतान ही सवलत स्विकारल्यार अमेरिकेच्या टॅरिफाचो परिणाम जाणवचो ना. जुलय आनी ऑगस्टात रशिया दिता ती सवलत 1 डॉलर प्रती बॅरल इतली आशिल्ली. रशिया त्या वेळार देशांतर्गत गरजांचेर लक्ष केंद्रीत करतालो.
ट्रम्पाच्या उलोवपा उपरांत भारताची रशियेंतल्यान तेल खरेदी नेटान वाडल्या आनी अमेरिकेच्या धमक्यांचो तेल खरेदीचेर कसलोच परिणाम जाल्लो ना. सद्याचे परिस्थितींत अमेरिकेन फटीच्या येवजण्यांक सुरवात केल्या आनी हातूंत पॅलस्टायन-इज्रायल संघर्श ट्रम्पाची फटीची येवजण आशिल्ल्याचें दिसून येता. तेच प्रमाण रशियेच्या तेला वेल्यान भारताचे बाबतींत ट्रम्पान घाल्लो तेलाचो बॉम्ब लेगीत पोको जाल्ल्याचें दिसून येता.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
